सुदूरपश्चिममे अधिकांश सांसद माधव नेपालओर

पहुरा समाचारदाता
धनगढी, ५ भदौ । माधव समूह नयाँ पार्टी नेकपा एकिकत समाजवादी दर्ता करलसंगे सुदूरपश्चिमके सांसद नयाँ पार्टीमे जैना वा केपी शर्मा ओली नेतृत्वके नेकपा एमालेमे रहना बारे छलफलमे जुटल बाटै । कौन नेता केकर पक्षमे लग्ना कना निश्चित नैहुइलेसे फेन अधिकांश प्रदेशसभा सदस्य नेपालसँग रहना नेपाल पक्षके नेताहुक्रनके दाबी रहल बा ।

आन्तरिक मामिला तथा कानुनमन्त्री पूर्णा जोशी ओ पूर्ववनमन्त्री माया भट्ट भर नेकपा एकिकृत समाजवादीके केन्द्रीय कमिटीमे समेटल बाटै । मन्त्री जोशी विगतमे जस्टे अब्बे फेन अधिकांश प्रदेश सासंद माधव नेपालके पक्षमे रहल बटैले बाटी । ‘तत्काल हम्रे दुई जाने प्रदेश सांसद केन्द्रीय कमिटीमे डेखल बाटी, जोशी कहली, ‘मने सुदूरपश्चिमके बहुमत प्रदेश सांसद माधव नेपालसंगे बाटी ।’ उहाँ नेपाल पक्षमे इहीसे आघे नै खुलसेकल १८ जाने सांसदमध्ये खासे टरेउप्पर हुइना अवस्था नैरहल बटैली ।

सुदूरपश्चिम प्रदेशमे नेकपा माओवादी नेतृत्वके सरकारसे पाछेकचो विश्वासके मत पाइबर एमालेके १७ जाने माधव समूह ओ ७ जाने ओली पक्षमे खुलल् रहिट । प्रदेश सभामे नेकपा एमालेके २५ जाने सदस्यमध्ये पूर्वमन्त्रीसमेत रहल प्रदेश सांसद पठानसिंह बोहरा, लिलाधर भट्ट, गेल्बुसिङ बोहरा, रतन थापा, माया तामाङ बोहरा, नेपालु चौधरी ओ बलदेव रेग्मी ओली पक्षमे खुलल् रहिट ।

उ मध्ये १८ जाने भीम रावल पक्षके रहिट । अब्बे रावलके पक्षमे प्रकाश बहादुर शाह ओ अर्चना गहतराज किल खुलल् बाटै । मने, रावल माधव नेपालके साथ छोरलपाछे के कहोर लागी कना आभिन प्रष्ट खुलल् नैहुइट । केपी शर्मा ओली ओ माधवकुमार नेपालबीच दूरी बह्रल ठनसे सुदूरपश्चिमके अधिकांश प्रदेशसभा सदस्य नेपालहे साथ डेहल रहिट । सुदूरपश्चिमे भीम रावलके प्रभाव बलगर मानजाइठ् ।

माधवकुमार नेपालहे साथ डेटी आइल रावल शेरबहादुर देउवा प्रधानमन्त्री नियुक्त हुइलठनसे तटस्थ डेखल बाटै । नेपालके साथ छोरल चर्चा चल्टीरहल बेला उहाँ नेपाल समूहके नयाँ पार्टी नेकपा समाजवादी दर्तामे फेन साथ नैडेलै । रावल साथ छोरल कारण माधव नेपालसे सुदूरपश्चिम प्रदेश सभामे कमजोर हुइल आकलन करे लागल बा । मने, अधिकांश प्रदेश सभा सदस्य रावल नेपालहे साथ नैडेलेसे फेन नयाँ पार्टीमे जैना मनसायमे डेखल नेपाल पक्षके दाबी करले बाटै ।

रावल निकट भौतिक पूर्वाधार विकास मन्त्री दीर्घबहादुर सोडारी फेन नेपालहे नै साथ डेना संकेत करलै ।‘मै कहोर लागम कना विषयमे ढिउर जाने अनुमान करसेकल हुइही । हम्रहीनहे नयाँ पार्टी रोज्न वा पुरानमे बैठ्ना छुट्याइक लाग २१ दिनके सुविधा रहल बा,’ उहाँ कहलै, ‘हम्रे हाली निचोडमे पुगब । अपनेहुक्रे पता पाजैबी ।’ ५२ सदस्यीय प्रदेश सभामे नेकपा माओवादीके १३, नेपाली काँग्रेसके १२ ओ राजपाके २ प्रदेश सभा सदस्य रहल बाटै । सुदूरपश्चिममे नेपाली कांग्रेस, माओवादी केन्द्र, जसपा ओ नेकपा समाजवादी गठबन्धनके सरकार बन्ना तय होसेकल बा ।