मुख्यमन्त्री भट्ट ओ प्रचण्डबीच भेटवार्ता

पहुरा समाचारदाता
धनगढी, ५ भदौ । सुदूरपश्चिम प्रदेशके मुख्यमन्त्री त्रिलोचन भट्ट ओ माओवादी केन्द्रके अध्यक्ष पुष्पकमल दाहाल ’प्रचण्ड’ बीच भेटवार्ता हुइल बा । शनिच्चरके काठमाडौंमे हुइल भेटवार्तामे सुदूरपश्चिमके भौतिक पूर्वाधार विकास मन्त्री दीर्घबहादुर सोडारी फेन उपस्थिती रहल रहे ।
प्रदेश सरकारके नेतृत्व फेरबदलके विषयमे चर्चा चुलल् बेला नेपाली कांग्रेस ओ जनता समाजवादी पार्टीहे सरकारमे लन्ना लगायतके विषयमे भेटवार्तामे छलफल हुइल जनाइल बा । ‘केन्द्रमे रहल सत्तारुढ गठबन्धन ओ उहे अनुसार गठबन्धनमे रहल पार्टीके प्रदेश सरकारमे सहभागिताबारे छलफल हुइल बा,’ भेटवार्तामे सहभागी एक नेता कहलै, ‘प्रचण्ड वर्तमान प्रदेश सरकार तत्काल परिवर्तन हुइना सम्भावना कम रहल बटैले बाटै । सुरुमे संघीय मन्त्रिमण्डल विस्तार हुइना ओ ओकर पाछे प्रदेश सरकारके नेतृत्व माओवादी नै कैना वा अन्य पार्टी कैना बारे निर्णय हुइना बटैलै ।’
यहोर प्रदेशमे भर सरकार परिवर्तन हुइना चर्चा चुलल् बा । माओवादीसे नेतृत्व कैटी आइल प्रदेश सरकार अब काँग्रेस वा माधव समूहके नयाँ पार्टीसे नेतृत्व कैना चर्चा रहल बा । ५३ सदस्यीय सुदूरपश्चिम प्रदेशसभामे अब्बे ५२ सदस्य बाटै ।
तत्कालीन आर्थिक मामिला तथा योजना मन्त्री झपटबहादुर बोहरा माओवादी परित्याग करलपाछे पार्टीके सिफारिसमे पदमुक्त हुइलपाछे प्रदेशसभामे ५२ जाने सांसद रहल बाटै । उहाँहुक्रन मध्ये तत्कालिन नेकपा एमालेके २५, माओवादी केन्द्रके १३, नेपाली कांग्रेसके १२ ओ जनता समाजवादी पार्टीके दुई जाने प्रदेशसभा सदस्य रहल बाटै । वितमे एमालेभिट्टर माधव समूहमे १७ जाने ओ ओली समूहमे ७ जाने सांसद खुलल रहिट ।
