रासायनिक मलके लाग पूर्व तयारी
पहुरा समाचारदाता
काठमाडौं, ७ भदौ । सरकारसे रासायनिक मल अभाव हुई नइडेना उच्च तहसे गृहकार्य सुरु करले बा ।
कृषि तथा पशुपन्छी विकासमन्त्रीसमेत रहल प्रधानमन्त्री शेरबहादुर देउवा मुख्यसचिव शंकरदास बैरागीसहित सम्बन्धित मन्त्रालयके उच्च पदाधिकारीहे बालुवाटारमे बोलाके नेपालहे तत्काल आवश्यक मल ओ भविष्यमेफे ओकर अभाव परिपूर्ति कैना सम्बन्धमे छलफल करले बा ।
रासायनिक मलके आवश्यकता ओ यकर अभाव टर्ना सम्बन्धमे हुइल छलफलमे कृषि सचिव कृष्णप्रसाद आचार्यफे सहभागी रहिट ।
प्रधानमन्त्री देउवा मल अभाव हुई नइडेना यकर दीर्घकालीन समस्या समाधान कैना का आवश्यक परठ, ओम्ने लग्ना कहल मुख्यसचिव बैरागी बटैलै । ‘तत्काल कटरा मल आवश्यक बा ? भविष्यमेफे कटरा चाही कना विषयमे प्रधानमन्त्री चासो लेके छलफल करलै,’ बैरागी कहलै ।
मन्त्रालयसे रासायनिक मल अभाव हटैना ५ वर्षके लाग जीटूजी (सरकार–सरकार) सम्झौता कैना तयारीफे करले बा । यकर लाग नेपाल विशेष करके भारत सरकारसंग सहकार्य करे लागल होरु। स्रोतके अनुसार भारतसे सहकार्य करके मल नन्ना सम्बन्धमे गृहकार्य कैना परराष्ट्र मन्त्रालयहे समेत सक्रिय हुइना प्रधानमन्त्री देउवा निर्देशन डेले बटै ।
मल अभाव हटैना सम्बन्धमे यी आघे नेपाल ओ भारतके सहसचिवस्तरीय वार्ता हुसेकल बा ।
भारतसंग कैसिक गृहकार्य आघे बढैना कना विषय छलफलके चरणमे रहल ओ निर्णय हुइना बाँकी रहल मुख्यसचिव बैरागी प्रस्ट्यइलै । हरेक वर्ष मल अभाव हुइना ओ समस्याके समाधान नइहुइना हुइलपाछे जौनफे दल सरकारमे अइलेसे आलोचना हुइटी आइल बा ।
सुरुआतमे सहसचिव, ओकरपाछे सचिवस्तरमे छलफल हुके अब्बे मन्त्रीस्तरमे समस्या समाधान कैना गृहकार्य आघे बढाइल होरु। नेपालमे समयमे टेन्डर नइहुके हरेक वर्ष मल अभाव हुइटी रहल बा ।
वार्षिक करिब १३ लाख टन रासायनिक मल चहना मन्त्रालय जनैले बा । व्यावहारिक रूपमे साढे ६ लाखसे ७ लाख टन हुके अभाव नइहुई । तीन लाख टन हुईबेर सर्वसाधारण मलके लाग नम्मा लाइन बैठे नइपरी ।
