कुलुवामे पुहके वृद्धाके मृत्यु
टीकापुर, ११ भदौ । कैलालीके लम्की चुहा नगरपालिका–६ गुलरामे कुलुवामे पुहके एक वृद्धाके मृत्यु हुइल बा ।
इलाका प्रहरी कार्यालय लम्कीके अनुसार करिव ९० बरसके फूखिया थरुनीके मृत्यु हुइल हो । उहाँहे स्थानीय चरेला कुलुवा पहुाइल इलाका प्रहरी कार्यालय लम्कीके प्रहरी निरिक्षक भरत शाह जानकारी डेलै । ओहकान कुलुवामे लहैना क्रममे थरुनी पुहके बेपत्ता हुइल रही । ओहकान शव झण्डे सात सय मिटर टरे भेटल रहे ।
ओस्टके कैलालीके जानकी गाउँपालिकामे बाढसे करिव डेढ सय घर डुबान परल बा । जिल्ला प्रशासन कार्यालय कैलालीके अनुसार वडा नं. ४ ओ ७ के बस्तीमे बाढ पेलल हो ।
जिल्ला प्रशासन कार्यालय कैलालीके सूचना अधिकारी शिवराज जोशीके अनुसार वडा नं. ४ मा गिदरपुर, खरैला गाउँके ८० ओ वडा नं. ७ मे जवलपुर, शंकरपुर, मुनुवा गाउँके ५८ घर डुबानमे परल जनाइल बा । पालिकाके अन्य वडामे समेत थप कुछ घर डुबानमे परल जनाइल बा ।
बाढ प्रभावित क्षेत्रमे सशस्त्र प्रहरीके टोली उद्दार करल बा । उद्दार टोलीसंगे गाउँपालिका अध्यक्ष प्रदिप चौधरी समेत लाउमे प्रभावित क्षेत्रमे पुगल रहिट । उहाँ सक्कु जनहनहे सुरक्षित स्थानमे सारल बटैलै ।‘मै सक्कु ओर पुगल बाटु । सक्कु जाने सुरक्षित बाटै’ उहाँ कहलै–‘खाद्यान्न लगायत भर पुहैले बा ।’
कर्णाली लडिया अन्र्तगतके कुलरीया कुलुवामे आइल बाढसे गाउँ पैँठल हो । यहाँ वर्षेनी कुलरीया कुलुवाके बाढसे समस्या निम्त्याइना करल बा ।
