बाढ पहिरोसे दुई घर भत्काइल पाँच घर जोखिममे

४ छेगरी मुलै

पहुरा समाचारदाता
धनगढी,११ भदौ । विफेक रातसे बरसल अविरल पानीसे दुई घर भत्काइल पाँच घर पहिरोके जोखिममे रहल बा ।

कैलालीके चुरे गाउँपालिका–६ मथुरिया बैठना भगिराम नेपाली ओ जोगा चुनाराके संयुक्त काठसे बनल खरसे छाइल छेगरीके खोर बर्षाके कारण भत्के जाके खोरभिटर रहल ९ ठो छेगरी मन्से ४ छेगरीके मुवल बटै । ओस्टेक वडा नम्बर ५ गोपामे सकारे पौने १० बजे ओर मिल बहादुर रानामगरके टिनसे छाइल २ कोठे कच्ची घर बर्षाके कारण भत्के जाके घर पुर्ण रुपमे क्षति हुइल बा । कलेसे मानविय तथा चौपाया क्षती नइहुइल बटाइल बा ।

ओस्टेक चुरे गाउँपालिका–५ के मानबहादुर थामीमगर, सुरतबहादुर थापा, डम्मरबहादुर थापा, गगन धामी ओ मनोज राईके टिनसे छाइल २/२ कोठे कच्ची टिनसे छाइल घर पहिरोक जोखिममे रहल जिल्ला प्रशासन कार्यालय कैलालीके प्रशासकीय अधिकृत तथा सूचना अधिकारी शिवराज जोशी बटैलै ।

ओस्टेक उहे ठाउँक खेम बहादुर सिजालीके काठसे बनल छेगरीके खोर भत्कल बा । स्थानीयतह संग समन्वय करके सुरक्षित स्थानमे रख्न पहल हुइटी रहल सूचना अधिकारी जोशी बटैलै ।

ओस्टेक करके विफे रात परल अबिरल बर्षाके कारण गोदावरी लडियासे कटान करके कैलालीके गोदावरी न.पा.४ स्थित काठे पुल, दुर्गा मन्दिरस्थित बैठना गणेश दत्त पाण्डेके ईटासे बनल टिनसे छाइल १ कोठे किराना/नास्ता पसल ओ काठसे बनल टिनसृ छाइल प्रतिक्षालय पुहैले बा । बाढसे गोदावरी न.पा.१२ हलौडे बैठना मान बहादुर धामीके ५/६ कट्टामे लगाइल धानमे खाडे खोलाके बाढ पैठके धान वाली नष्ट हुइल बा ।

ओस्टे बाढसे धनगढी–राजघाट जोरना स्काई फोल्डिङ पुल जैना डगर राजघाटओर पुरे भत्कल बा ।

ओस्टेक कर्णाली लडियक बहावसे टिकापुर ५ अन्तर्गत शाहिपुरमे कटान करल ओ कटान हुइना क्रम जारी रहल ओरसे तटीय क्षेत्रके सक्कुहुनहे सजक रहना जिल्ला प्रशासन कार्यालय कैलाली अनुरोध करले बा ।

ओस्टेक कैलालीके जानकी गाउँपालिका–४ के १० घरधुरी ओ वडा नम्बर ७ के ५ घरघुरीमे पानी पैठल बा । कलेसे लाउ लेके सशत्र प्रहरीके टोली उद्धार कार्यमे रहल जनागिल बा ।