भागरथी भट्टके परिवारहे आर्थिक सहयोग

पहुरा समाचारदाता
धनगढी, १२ भदौ । बलात्कार पाछे हत्या करल बैतडी दोगडाकेदार गाउँपालिका ७ चडेपानीके १७ वर्षिया भागीरथी भट्टके परिवारहे सुदूरपश्चिम प्रदेशके मुख्यमन्त्री त्रिलोचन भट्ट आर्थिक सहयोग हस्तान्तरण करले बाटै ।

मुख्यमन्त्री भट्ट शनिच्चरके एक कार्यक्रमके बीच दुई लाख ७० हजार बराबरके आर्थिक सहयोग हस्तान्तरण करल हो । नेपालिज एशोसियसन अफ भिक्टोरिया न्याभ ओ मल्टी डाईनामिक रियल स्टेट मेलबर्न अष्ट्रेलिया उपब्ध कराइल दुई लाख सत्तरी हजार आठ सय चालिस रुपैंया मुख्यमन्त्री भट्ट पीडितके आफन्तहे हस्तान्तरण करल हुइट ।

विकासमे सृजनशिलता नेपाल सिआईडी नामक संस्थाके सहकार्य ओ समन्वयमे उ रकम पीडित परिवारहे हस्तान्तरण करल रहे । सुदूरपश्चिम प्रदेश मुख्यमन्त्री कार्यालयमे आयोजना करल रकम हस्तान्तरण कार्यक्रमके अध्यक्षता संस्थाके अध्यक्ष डिल्ली भट्ट करल रहिट ।