हसुलियामे बरघर सम्मेलन हुइना
पहुरा समाचारदाता
हसुलिया, १३ भदौ । कैलालीके कैलारी गाउँपालिकाके हसुलियामे बरघर भल्मन्सा सम्मेलन हुइना हुइल बा ।
थारू समुदायके बरघर भल्मन्सा प्रथाहे कानुनी मान्यता डेहे पर्र्ना, बरघर भलमन्साहे पारिश्रमिकके व्यवस्था सहित कानुनी रुपमे प्रशिक्षण करे पर्र्ना, थारू भाषा कला संस्कृति संरक्षण सम्बद्र्धन करे पर्र्ना लगायतके उद्देश्य सहित सम्मेलन हुइना जनाइल बा ।
सम्मेलनके लाग शनिच्चरके हसुलियामे बरघरहुक्रनके भेला सम्पन्न हुइल बा । भेलासे भल्मन्सा सन्तराम चौधरीके संयोजकत्वमे २१ सदस्यीय बरघर सम्मेलन तयारी समिति फेन गठन करगिल बा । जेकर सहसंयोजक धनिराम चौधरी ओ सचिव रमेश चौधरी रहल बाटै ।
कैलालीके कैलारी गाउँपालिका भलमन्सा प्रथाहे कानुनी मान्यता डेना जनैले बाा । गैल असारमे हुइल गाउँपालिकाके आर्थिक बरस २०७८/०७९ के नीति तथा कार्यक्रममे गाउँपालिका अध्यक्ष लाजुराम चौधरी भलमन्सा प्रथाके कानुनी व्यवस्थापनके साथे उहाँहुक्रनके क्षमता अभिवृद्धि, तालिम ओ सेवा सुविधा उपलब्ध करैना बटाइल रहिट ।
यकर साथे गाउँपालिकासे थारू कला, साहित्य ओ संस्कृतिके पहिचान, सम्बद्र्धन ओ संरक्षण कैना थारू समुदायके प्राचिन भलमन्सा प्रथाके जगेर्ना कैना आपन नीति तथा कार्यक्रममे उल्लेख करले बा ।
