अफगानिस्तानसे २० वर्षे युद्ध ओरवाके लौटल अमेरिका

काठमाडौं, १५ भदौ । अमेरिका अफगानिस्तानमे अपन २० वर्षसेके सैन्य उपस्थिति औपचारिक रूपमे ओरवैले बा । अफगानिस्तानसे सोम्मार अमेरिकी सेनाके अन्तिम डफ्फा लौटलसँगे दुई दशक लम्मा युद्ध अन्त्य हुइल हो ।

अमेरिकी सेनाके सेन्ट्रल कमान्डके कमान्डर जनरल फ्र्याक म्याककेन्जी सोम्मार अमेरिकी सेनाके अन्तिम डफ्फा काबुलसे लौटल जानकारी डेलैं । उहाँ पत्रकारहुकनसँगके बातचितमे कलैं, ‘मै यहाँ अफगानिस्तानसे हमार घरफिर्ती अभियान ओ अफगानिस्तानसे अमेरिकीसहित तेसर मुलुक ओ जोखिममे रहल अफगानी नागरिकके सैन्य उद्धार ओराइल घोषणा करे उपस्थित हुइल बटुँ ।’

उहाँक अनुसार अमेरिकी सेनाके अन्तिम जहाज सी–१७ काबुलस्थित हमिद कारजाई अन्तर्राष्ट्रिय विमानस्थलसे सोम्मार दिनके ३ बजके २९ मिनेटमे उरल रहे । उहाँ आघे कलैं, ‘यी उरानसँगे धेर पीडादायी क्षण फेन बा । हम्रे चाहल सबहे नाने नैसेक्ली ।’

अमेरिकी राष्ट्रपति जो बाइडेन सोम्मार एक वक्तव्य जारी करटि अमेरिकी सेनाहे धन्यवाद डेले बटैं । तोकल समयभित्तर सब लौटना सफल रहल उहाँ जनैले बटैं । ‘गैल १७ दिनमे हमार सेना अमेरिकी इतिहासके भारी हवाई उद्धार करले बा । अमेरिकी नागरिक, हमार सहयोगी मुलुकके नागरिक ओ अफगानी नागरिक करके १ लाख २० हजारसे ढेरके उद्धार हुइल बा । उहाँहुक्रे यी कार्य बेजोड साहस, व्यावसायिकता ओ संकल्पके साथ करलैं,’ राष्ट्रपति बाइडेनसे जारी वक्तव्यमे कहल बा । उहाँ अफगानिस्तानमे २० वर्ष लम्मा सैन्य उपस्थिति ओराइल फेन बटैलैं । ‘आब अफगानिस्तानमे २० वर्षसे हमार सैन्य उपस्थिति ओराइल बा,’ उहाँ कलैं ।

अमेरिकी रक्षा मन्त्रालय पेन्टागनके प्रवक्ता जोन किर्बी अमेरिका अफगानिस्तानसे १ लाख २२ हजारसे ढेरके उद्धार करल जानकारी डेले रहैं ।