समानान्तर कमिटी गठन करुइया नेताहे कारवाही
पहुरा समाचारदाता
धनगढी, १७ भदौ । राष्ट्रिय जनमोर्चासे समानान्तर कमिटि गठन करुइया टमान तहके नेताहे साधारण सदस्य समेत नैरहना मेरके कारबाही करले बा ।
धनगढीमे शुकके आयोजित पत्रकार सम्मेलनमे राष्ट्रिय जनमोर्चाके महासचिव मनोज भट्टसे सुदूर पश्चिममे समानान्तर समिति गठन कैटी ओकर नेतृत्व करुइया केन्द्रीय सदस्य लाल बहादुर जाग्री, केन्द्रीय सल्लाहकार लोकेन्द्र लम्साल, केन्द्रीय पार्षद लक्षीराम आचार्य, गोविन्द बिक ओ केशवनाथ योगीहे सक्कु पद ओ जिम्मेवारीसे हटाइल बटैलै ।
उहाँ केन्द्रीय समितिके बिफेक रोज बैठल बैठकसे समानान्तर समिति गठन करुइयाहे सक्कु जिम्मेवारीसे मुक्त कैटी अनिश्चितकालके लाग पार्टीके साधारण सदस्यसे कारबाही कैना निर्णय करल जानकारी डेलै ।
राष्ट्रिय जनमोर्चाके महासचिव भट्ट भारतीय पक्षके उक्साहटमे एमाले अध्यक्ष केपी शर्मा ओलीके गणतन्त्र, धर्म निरपेक्षताहे समाप्त पारे खोजल ओ घरी घरी संसद बिघटन करल ओरसे जनमोर्चा ओकर बिरुद्ध पाँच दलीय गठबन्धनमे सहभागी हुइल बटैलै ।
केपी ओलीके नेतृत्वमे संसद बिघटन कैके मुलुकहे अस्थिर बनैना ओ राजतन्त्रहे फर्कैना प्रयत्न हुइल ओरसे राष्ट्रिय जनमोर्चा ओकर विपक्षमे गठन हुइल पाँच दलीय गठबन्धनमे सहभागी हुइल नेता भट्टके कहाइ रहे ।
