बालबालिकाहे शैक्षिक सामग्री

पहुरा समाचारदाता
हसुलिया, २९ भदौ । कैलालीमे टमान कार्यक्रमके आयोजना कैके ५७ औं राष्ट्रिय बाल दिवस मनाईल बा ।

इहे बिच कैलारी गाउँपालिकामे फेन टमान कार्यक्रम सहित बाल दिवस मनाईल बा । ‘सामान्य अवस्था वा कोभिड महामारी ः बाल अधिकार संरक्षण हमार जिम्मेवारी’ कना मूल नारा सहित राष्ट्रिय बाल दिवस मनाईल हो ।

दिवसके अवसरमे अपांगता, संरक्षण विहिन ओ विपन्न परिवारके बालबालिकाहे शैक्षिक सामग्री ओ स्कूल ब्याग सहयोग करल रहे ।

महिला तथा बालबालिका शाखा प्रमुख बालकुमारी चौधरी गाउँपालिकाके वडा नम्बर १ से ९ समके ८० जाने बालबालिकाहे उ सामग्री वितरण करल जानकारी डेली ।

कार्यक्रममे गाउँपालिका अध्यक्ष लाजुराम चौधरी बालबालिका भविष्यके कर्णधार रहल ओरसे ओइनके इच्छा आकांक्षा लगायत शिक्षा स्वास्थ्यमे विशेष ध्यान डेहे पर्ना बटाइल रहिट । उहाँ कहलै– ‘बालबालिका हमार लाग किल नैहोके, समाज तथा राष्ट्रके लाग महत्वपूर्ण हुइट । प्रत्येक राष्ट्रके भविष्यके कर्णधार अर्थात् काल्हके देश निर्माता आजके बालबालिका नै हुइट ।’

मुलुकके भविष्यके उत्तरदायी बालबालिका रहल ओरसे उहाँहुक्रनहे मजा मार्ग निर्देशन करे पर्ना आवश्यक रहल बटैलै । कार्यक्रममे पारदर्शी महिला विकास बहुउद्देश्यीय सहकारी संस्थाके व्यवस्थापक कौशी बोहरा व्यक्तिगत १८ ठो स्कूल ब्याग सहयोग करल रही ।

महिला तथा बालबालिबा शाखाके आयोजनामे हुइल कार्यक्रमहे पारदर्शी महिला बहुउद्देश्यीय सहकारी संस्था, सामाजिक सेवा अध्ययन केन्द्र कैलाली सहयोग करल रहे ।

कार्यक्रममे विद्यालय निरीक्षक गणेश प्रसाद मिश्र, इलाका प्रहरी कार्यालयका प्रमुख लगायत शुभकामना मन्तव्य राखल रहिट । कार्यक्रममा सामाजिक विकास अधिकृत यगम कलेल कार्यक्रमके उद्देश्य ओ कार्यक्रम सञ्चालन करल रहिट ।