विशिष्ट समस्याहे प्राथमिकरणः मन्त्री खडका
पहुरा समाचारदाता
धनगढी, ३१ भदौ । सुदूरपश्चिम प्रदेशके सामाजिक विकास मन्त्री लाल बहादुर खडका छाउपडी प्रथा प्रदेशके विशिष्ट समस्या रहल बटैले बटै ।
राष्ट्रिय मानव अधिकार आयोगके आयोजनामे बुधके रोज धनगढीमे हुइल ‘विश्व व्यापी आवधिक समिक्षा सम्बन्धी कार्यक्रममे’ बोल्टी मन्त्री खडका प्रदेशके पहाडी जिल्लामे यी प्रथा जर गाडके बैठल ओ व्यवस्थित हुई नइसेकल बटैलै । उहाँ कहलै, हम्रे छाउगोठ भत्कैठी मने उ भिटरके समस्या नइबुझठी ।
प्रदेशमे विशिष्ट खाले समस्यामे मुक्तकमैया, मुक्तहलियाके समस्या व्यवस्थापन हुई नइसेकल, शुक्लाफाँटा राष्ट्रिय निकुञ्जके क्षेत्र विस्तार कैना क्रममे विस्थापित २४ सय ७३ परिवार शिविरके रुपमे बैठल बटै यीफे प्रदेशके खास समस्या हो मन्त्री खडका कहलै । प्रदेशमे अभिनफे जातिय विभेद, छुवाछुटके अन्त्य हुई नइसेकल ओरसे यहोरफे सरकारसे ध्यान डेना बटैलै ।
राष्ट्रिय मानव अधिकार अयोगके माननीय सदस्य लीली थापा सुदूरपश्चिम प्रदेशमे छाउपडी प्रथा भिटर रहल मनके गोठ भत्कैना आवश्यक रहल बटैली । सुदूरपश्चिम प्रदेशके मुख्य न्यायधिवक्ता कुलानन्द उपाध्याय प्रदेशमे रहल महत्वपूर्ण समस्याहे पहिचान करके जैना आवश्यक रहल बटैलै । सुदूरपश्चिम प्रदेशके डिआइजी पुरुषोत्तम कँडेल प्रहरीफे समाजके एक ठो अंग रहल ओरसे सु शान्ति कायम कैना सक्कुहुनके साथ सहयोग आवश्यक रहल बटैलै ।
वरिष्ठ पत्रकारद्वाय चित्राङ थापा ओ निर्मला शर्मा कञ्चनपुरके निर्मला पन्तके हत्यारा खोज्नमे कमी कम्जोरी हुइल ओरसे अभिनसम दोषी पक्राउ परे नइसेकल बटैलै । दोषी पत्ता लगाइक लाग रिपोर्ट केल सार्वजनिक हुइल उहाँहुक्रे बटैलै ।
यूएनडीपिके जयन्ती गिरी महिलाहे हेर्ना निकाय कम्जोर रहल बटैली । दलित महिला अधिकार मञ्चके अध्यक्ष सावित्रा घिमिरे विश्व व्यापी आवधिक समिक्षा (युपीआर) मे अधिकारमुखी सुझाव संकलन करलेसेफे कार्यान्वयनमे फितलो डेखल बटैली ।
एनएनडिएसडब्लुओ के अध्यक्ष चक्र विक प्रदेशमे जातिय विभेद अभिनफे कायम रहल बटैलै । नेफिनके प्रदेश अध्यक्ष दलबहादुर घर्तीमगर सरकार भाषा संरक्षणमे ध्यान नइडेहल बटैलै । द्वन्दपीडित साझा चौतरीके प्रदेश अध्यक्ष गणेश मल्ल शसस्त्र द्वन्द पीडितहुकनके माग सरकार अभिन सम्बोधन करे नइसेकल बटैलै ।
सर्वाङिण अपांगता विकास समाज नेपाल धनगढी कैलालीके कार्यकारी निर्देशक नन्दराज भट्ट बनल भौतिक संरचनामे सक्कु जानेक पहुँच नइपुगल बटैलै । कार्यक्रममे अपाङता रहल व्यक्तिहुकनहे कम सहभागिता करैटी रहल बटैलै ।
समावेशी शिक्षक नइहुइल कारण अपाङता रहल व्यक्तिनहे समस्या परलफे उहाँ कहलै । ओस्टेक राजु लामा लैङिक तथा अल्पसंख्यक समुदायके समस्यामे सरकार गम्भीर नइहुइल बटैलै । सिविन नेपालके हरिलाल चौधरी बालबालिकाके समस्याबारे जानकारी डेहल रहिट ।
राष्ट्रिय मानव अधिकार आयोगके सहसचिव नवराज सापकोटा, मञ्जु खटिवडा विश्व व्यापी आवधिक समिक्षा (युपीआर) मे नेपालके तरफसे पहिल चक्र सन २०११ मे १३५ ठो सिफारिस प्राप्त हुइलमे १२० ठो स्विीकार, दुसरा चक्र सन २०१५ मे १९५ ठो सिफारिस प्राप्त हुइलमे १५२ठो स्विीकारल ओ टिसरा चक्रमे अब्बे २३३ ठो सिफारिस प्राप्त हुइलमे १९५ ठो स्वीकारल बटैलै ।
कार्यक्रममे स्वागत आयोगके सहसचिव डा. टीकाराम पोख्ररेल ओ संचालन आयोगके सुदूरपश्चिम संयोगक मोहन जोशी करले रहिट ।
