छानबिन समिति गठनमे सहमति नइहुके ताला यथावत

पहुरा समाचारदाता
चौमाला, ३१ भदौ । गौरीगंगा नगरपालिकामे सोम्मारसे लागल तालाबन्दी चौठा दिनफे जारी बा । छानबिन समितिमे गठनमे सहमत नइहुके वार्ता निष्कर्षमे पुगे नइसेकल हो ।

दलहुक्रे नगरपालिकामे डेखल अनियमितताके यथार्थ छानबिन करके सार्वजनिक कैना समिति बनैना बिषयमे सहमति हुई नइसेक्के तालाबन्दी लम्बल बा ।

बुधके साँझ आन्दोलनरत दल ओ नगर प्रमुख भीम बहादुर देउवाबीच दलहुक्रे उठाइल माग सम्बोधन कैना तथा दलहुक्रे सहभागी छानबिन समिति बनैना सहमति हुइल बिफे सम्झौतामे हस्ताक्षर कैना बेला कानुनी अड्चन अइना कहटी निर्णय हेरफेर करलेसे केल हस्ताक्षर कैना देउवासे अडान राखलपाछे सहमति नइहुइल नेपाली काँग्रेसके नेता दिनेशराज जोशी बटैलै ।

बुधके सहमति अनुसारके छानवीन समिति गठनके निर्णयमे मेयर देउवासे सहमति हुई नइमानलपाछे दलहुक्रे अपन दलसे नगरकार्यपालिका वा नगरसभामे प्रतिनिधित्व कैना सदस्य मन्से ५ सदस्यीय छानबिन समिति गठनके प्रस्ताव करलेसेफे नगरप्रमुख देउवा अपन दलके प्रतिनिधिफे छानबिन समितिमे राखे पाई पर्ना अडान राखलपाछे सहमति हुई नइसेकल हो ।

आन्दोलनरत पाँच दलीय गठबन्धनके दल मन्से ४ दलके नगरकार्यपालिकामे प्रतिनिधित्व रहल बा । एक सदस्य सचिव सहित आन्दोलनरत दलके प्रतिनिधित्व हुइना करके नगरकार्यपालिकाभिटरके सदस्य सहभागी छानवीन समिति बनाईबेर एक जाने प्रतिनिधि छानबिन समितिमे अपन ओरसे धारे पाई पर्ना नगरप्रमुख देउवा बटैलै । मोर राजनीति दलकेफे सहभागिता रहे कना अडान छलफलके क्रममे देउवा रख्ले रहिट ।

आन्दोलनमे सहभागी नइहुइल दलके सहभागीतामे छानबिन समिति गठनके औचित्य नइहुइना तर्क दलहुक्रे राखलपाछे तालाबन्दी यथावत् रहल हो ।

नगरप्रमुखसे छानबिन समितिके सदस्यमे एमालेके जनप्रतिनिधिफे समेत सहभागी करे पाई पैना अडान नइछोरके अडडी लेहलपाछे सहमति हुई नइसेकल राष्ट्रिय जनमोर्चाके उमेश कडेल बटैलै ।