छावाडाइक निःशुल्क उपचार
पहुरा समाचारदाता
धनगढी, ३१ भदौ । बाजुराके मुत्तिकोट १ के भावना कामी ओ उहाँक नौ महिने छावा सुमित कामीके निसर्ग हस्पिटलसे निशुल्क उपचार करले बा ।
डाईहे रक्तश्राव हुइना ओ छावाहे निमोनियाके समस्या रहल ओरसे अस्पतालमे उपचार करल बा । धनगढीमे रहल निसर्ग अस्पतालमे शुकके भर्ना हुइल २४ बर्षीया भावना कामी ओ उहाँक नौ महिने छावा सुमित कामीके निःशुल्क उपचार करल हस्पिटलके अध्यक्ष तीर्थराज पन्त बटैलै ।
‘पहिरोसे घरफे लैगिलपाछे छिमेकीके गाई गोठमे बैठटी रहल बटी’ भावनाके गोसिया उज्वल कामी कहलै, ‘यिहे बेला डाई छावा बिरामी हुइलै ।’ घरखर्च चलैनाफे बहुट मुस्किल हुइल ओइनके असार ६ गते आइल पहिरोसे बैठना घरफे भँठडेहल रहे ।
डाईहे छिनछिनमे रक्तस्राव हुइना ओ बच्चाहे निमोनियाके समस्या डेखल रहे । निमोनियासे ग्रसित बालकहे अक्सिज डेके उपचार करे परल रहे कलेसे डाईहे डाक्टरके विशेष निग्रानीमे उपचार करके सन्चो पारल अध्यक्ष पन्त बटैलै ।
अस्पतालसे निःशुल्क उपचार करके भारी गुन लगाइल उज्वल बटैलै । उहाँ कहलै, ‘मोर आर्थिक अवस्थासे टे मै ओइनहे जोगाई सेक्ना नइरहु । अस्पतालसे मोर जहान परिवारके ज्यान जोगाडेहल ।’
