पटेला थारु संग्रहालयके उद्घाटन
पहुरा समाचारदाता
धनगढी, २ कुवाँर । कैलालीके धनगढी उपमहानगरपालिका वडा नम्बर ७ पटेला गाउँमे स्थापना करल पटेला थारु सांस्कृतिक संग्रहालयके उद्घाटन करल बा ।
उ संग्राहलयके उद्घाटन उपमहानगरपालिकाके प्रमुख नृपबहादुर वड, उपप्रमुख सुशीला मिश्र भट्ट ओ वडाध्यक्ष सीताराम राना संयुक्त रुपमे उद्घाटन करल रहिट ।
संग्रहालयके उद्घाटन करटी उपप्रमुख भट्टसे थारु कला संस्कृतिके जगेर्ना कैना संग्रहालयसे महत्वपूर्ण भूमिका खेल्न कहटी संग्रहालय हेरे अइना आन्तरिक तथा बाह्य पर्यटकहे थारु समुदायबारे टमान जानकारी डेना सहयोग पुगैना बटैली ।
कार्यक्रममे नगरप्रमुख वड ९८ प्रतिशत थारु जातिके केल बसोबास रहल पटेला गाउँमे थारु संग्रहालय स्थापना हुइना अपनमे गर्वके बाट रहल बटैली । उहाँ धनगढी बजारसे लग्गे रहल संग्रहालय हेरे अइना वातावरण बनैना अपने सेक्ना सहयोग कैना बटैटी पटेला गाउँमे होमस्टे निर्माणके लाग उपमहानगरपालिकासे पहल सुरु कैना बटैलै ।
संग्राहलयमे थारु जातिके टमान रहनसहन, सांस्कृतिक झल्कना डेल्वा, सोनकरै, बर्छी, चोलिया, गोनिया, रंगीन ढकिया, पनछोपनी, छटरी, कोल्ह, हर, जुवा, किल्वाही, हेगा, लह्रिया, घचिया गोन्द्री, पेटारी गोन्द्री, डोकनी, ढेकी, ढेकी, हेल्का, डेल्या, टापी, जाल, ढडिया, खोन्घया, बन्ठी, सुप्पा, छिटवा छिटवा, माटिक भाँडा, हुक्का, मन्डरा, ढोल, चौरी (लहरा) मन्जिरा, खटिया, पगिया, जामाचौबन्दी, टोपी, पौवा, चकिया, भित्रेचित्र, सुटिया माला, झिलझिलिया, टरिया, लखक चुरिया, कारा, कन्सेहरी, झोफहा विरा, फरिया, गुरिया, बराहा, कुठली, जबरा, डेहरी धारल पटेला थारु सांस्कृतिक संग्राहलय उपभोक्ता समितिके अध्यक्ष पार्वती चौधरी बटैली ।
पटेला थारु संग्राहलय सहरी विकास तथा भवन निर्माण विभाग संघीय सरकारके बजेटसे बनल हो, जेकर लागत बजेट १ करोड ८४ लाख १७ हजार ४ सय ९४ रुप्या रहल धनगढी उपमहानगरपालिकाके इन्जिनियर दिजराज भट्ट बटैलै । नगरपालिकासे पटेला थारु संग्राहलयके सामान व्यवस्थित कैना ओ ¥याग बनाइक लाग १२ लाख रुप्या बजेटफे विनियोजन करल रहे ।
निर्माण कम्पनी २०६६ साल कार्तिक महिनामे भवन निर्माण सम्पन्न कैके नगरपालिकाहे बुझासेकल रहे । थारु सांस्कृतिक संग्राहलय संचालन करेक लाग धनगढी उपमहानगरपालिकासे स्थानीय वडामे एक ठो समिति गठन करल रहे । पटेला थारु संग्राहलय पटेला सामुदायिक वन क्षेत्रमे सार्वजनिक जग्गा करिब ६ कटठामे रहल बा ।
