असुरक्षा महसुस कैटी कर्मचारीनसे तालाबन्दी

पहुरा समाचारदाता
धनगढी, ५ कुँवार । नेपाल विद्युत प्राधिकरण प्रादेशिक कार्यालय अत्तरियामे कार्यरत कर्मचारी अपनहे कार्यालयमे ताला लगैले बाटै ।

सुदूरपश्चिमके टमान क्षेत्रमे विगत तीन बरससे विद्युत मर्मतमे कार्यरत मजदुर सोम्मारसे कर्मचारीहे भिट्रे थुनके ताला लगाइलपाछे मंगरके प्रादेशिक कार्यालयमे कार्यरत कर्मचारी अपनहे भिट्टरसे ताला लगाके प्रवेश निषेध करल हुइट ।

सोम्मारके आगामी दुई बरस विद्युत मर्मतके लाग जिम्मेवारी पाइल नयाँ ठेकेदार आपनहे निकारल कहटी मजदुर तालाबन्दी करल रहिट । नेपाल विद्युत प्राधिकरण प्रादेशिक कार्यालय अत्तरियाके प्रमुख जंगबहादुर चन्द कार्यालयमे कार्यरत कर्मचारी असुरक्षित महसुस करलपाछे ताला लगाइल हुइ सेक्ना बटैलै ।

कर्मचारी असुरक्षित महसुस करलपाछे गेट ओ कार्यालयभिट्टर तालाबन्दी कैके भिट्टरसे काम करल बटाइल बा ।