४२ औं सामाजिक सेवा दिवसमे सहयोग हस्तान्तरण

पहुरा समाचारदाता
धनगढी, ६ कुवाँर । ४२ औं सामाजिक सेवा दिवसके अवसरमे गैर सरकारी संस्था महासंघ, समाज कल्याण परिषद ओ अइनसे धनगढीस्थित आमाको माया छात्रबासहे सहयोग हस्तान्तरण कैगिल बा ।

उ छात्रबासहे हाइजिनिक किट, स्वास्थ्य सामग्री ओ नगद हस्तान्तरण करल बा । सहयोग हस्तान्तरण करटी गैरसरकारी संस्था महासंघके केन्द्रीय सचिव धर्मराज पाठक सामाजिक सेवामे लगानी लगुइयाके संख्य कम रहल बटैलै । उहाँ कहलै, प्रदेश सरकारसे मठ मन्दिर निर्माण करेक लाग ढेर बजेट विनियोजन करठ, मन्दिरमे उठल भेटीसे सामाजिक विकासमे लगानी करे परठ कना भावनाके विकास नइहुइल बटैलै ।

जलम दिनमे फजुल खर्च बनाके अनाथलय सहयोग कैलेसे सामाजिक धर्म हुइना बटैलै । गैरसरकारी संस्था महासंघुे नगद १० हजार ओ एक दिनके खाजा, निडसके ओरसे ३२ पकेट हाइजिनिक किट, वल्र्ड भिजनसे स्वास्थ्य सामग्री हस्तान्तरण करल रहे ।

सहयोग सामग्री गैरसरकारी संस्था महासंघके केन्द्रीय सचिव धर्मराज पाठक, प्रदेश इन्चार्ज भवराज रेग्मी, वर्ल्ड भिजनके फिल्ड निति तथा संचार प्रमुख विनय प्रकास बरालसे माया छात्रबासके अध्यक्ष शारदा शाहहे हस्तान्तरण कैगिल रहे ।

गैरसरकारी संस्था महासंघके प्रदेश इन्चार्ज भवराज रेग्मीके अध्यक्षतामे हुइल कार्यक्रमके संचालन गैरसरकारी संस्था महासंघके प्रदेश अध्यक्ष देवी खनाल करले रहिट ।