थारु सुपरस्टार प्रेम चौधरीके फिल्मी क्षेत्रओर कमब्याक
पहुरा समाचारदाता
धनगढी, ८ कुँवार । थारु सुपरस्टार प्रेम चौधरीके फेनसे फिल्मी क्षेत्रमे कमब्याक हुइल बा । दुई दशक आघेक फिल्म बौछारके गीत गाउँमे डेख्नु गल्यारेमे डेख्नु बोलके एकदमे चर्चित गीतके रिमेक भिडियो मार्फत उहाँ फेनसे फिल्मी क्षेत्रओर डेख परल हुइट ।
उहाँ अभिनित थारु फिल्म जीवन एक लडिया हो, हटाइ कुहिरा, बौछार लगायत सुपरहिट रहल बा । उ बेला उहाँके अभिनयहे दर्शकहुक्रे खोब मन परैले रहिट । अब्बे उहाँ म्युजिक भिडियो मार्फत फेनसे फिल्मी क्षेत्रओर कमब्याक हुइल बटै । कलेसे उहाँक संगे नायिका अनुराधा चौधरी फेन कमब्याक हुइल बटी ।
अब्बे उ म्युजिक भिडियोके धमाधम छायांकन हुइटी रहल बा । म्युजिक भिडियोमे नायक संगत चौधरी ओ मुस्कान चौधरीके फेन अभिनय रहना जनाइल बा ।
निर्देशक हिरा चौधरी रहल भिडियाके छायांकन सतिश सिन्हाके रहल बा । रिमेक भर्जनमे राजकुश्मी ओ अन्नु चौधरीके स्वर रहल बा । म्युजिक भिडियो हाली बजारमे अइना निर्माण पक्ष जनैले बा ।
