मानव वेचविखन तथा ओसारपसार ऐन निर्माणके पहल कैना प्रतिबद्धता
पहुरा समाचारदाता
धनगढी,२८ कार्तिक । सुदूरपश्चिम प्रदेसभा सदस्य तथा प्रदेश मन्त्रालयके कर्मचारीहुक्रे हाली मानव वेचविखन तथा ओसारपसार सम्बन्धी ऐन निर्माणके पहल कैना प्रतिबद्धता जनैले बटै ।
महिला कानून र विकास मञ्चके आयोजना तथा युयसएआइडी, युकेयड, र वीन रकको सहकार्यमे अँटवारके रोज धनगढीमे आयोजित छलफल कार्यक्रममे सुदूरपश्चिम प्रदेश सामाजिक विकास समितिके सभापति, विधायन तथा प्रदेश मामिला समिति, प्रदेशसभा सदस्य ओ कर्मचारीके सहभागिता रहल रहे ।
सहभागिहुक्रे कानून निर्माण कैना ढिलाई हुइल कहटी हाली मस्यौदा तयार करके छलफल कैना प्रतिबद्धता जनाइल हुइट । सामाजिक विकास समितिके सभापति कुन्ती जोशी विधेयक निर्माणके लाग कर्मचारी, न्यायधिवक्ताके कार्यालयमे दवाव डेना बटैली ।
राजनीतिक खिचातानीके कारण ढेर ऐन निर्माण कार्य पाछे धकेलल बटैटी उहाँ कुछ बनल विधेयकमे समेत छलफल हुई नइसेकल बटैली । मानव वेचविखन, महिला हिंसा, छाडपडी प्रथा, बोक्सी प्रथा जैसिन ढेर विकृति सुदूरपश्चिममे कायमे रहल बटैटी उहाँ उ ऐन हाली निर्माण करके कार्यान्वयन कैना आवश्यक रहल बटैली ।
प्रदेश विधायन तथा प्रदेश मामिला समितिके सभापति नेपालु चौधरी मानव वेचविखन तथा ओसारपसार सम्बन्धमा ऐन निर्माण कैना छलफल हुइलेसेफे यकर निर्माण प्रक्रिया सुरु हुई नइसेकल बटैलै । उहाँ ऐन निर्माण प्रक्रियामे आइल समस्या पत्ता लगाके थप काम आघे बढैना प्रतिबद्धता जनैलै ।
ओस्टेक करके सुदूरपश्चिम प्रदेशसभा सदस्य तथा नेकपा एकिकृत समाजबादी पार्टी संसदीय दलके प्रमुख सचेतक दुर्गा विक सुदूरपश्चिमके परिवेसमे मानव वेचविखन सम्बन्धी ऐन बहुट आवश्यक हुइना कहटी ऐन निर्माणमे सक्कु निकायहे दवाव डेना बटैटी । संसदीय दलमे अपन पार्टी भारी रहल ओ सरकारमे समेत सहभागि रहल कारण अपने मन्त्रीहेफे ऐन निर्माण कैना दवाव डेना उहाँ प्रतिबद्धता जनैली ।
प्रदेशसभा सदस्य मालामति रानाफे ऐन निर्माणके लाग संसदमे आवाज उठैना प्रतिबद्धता जनैली । उहाँ असिन कानून ३ बर्ष आघे बने पर्ना हुइलेसेफे सरकारके कम्जोरीके कारण ढिलासुस्ती हुइल बटैली ।
कार्यक्रममे बार एशोसिएसनके अध्यक्ष सिद्धराज ओझा कानून बन्लेसे मानव वेचविखन तथा ओसार पसार कम करे सेक्ना बटैलै । कानून बनैले पीडित पक्षाके सुरक्षासंगे आर्थिक रुपमेफे ध्यान डेहे पर्ना उहाँ जोड डेलै ।
ढेर पीडित आर्थिक समस्याके कारण मुद्दा लरे नइसेक्ना अवस्थामे हुइना करल बटैटी उहाँ ओसिन कानूनहे समेटे पर्ना बटैलै । बार एशोसिएसनसे आर्थिक रुपमे अशक्त, तथा कानून नइजानल पीडितहे निःशुल्क कानूनी सहायत प्रदान कैना करल बटैटी उहाँ असहायके लाग अइना दिनमेफे सहकार्य कैना बार तयार रहल बटैलै । सुदूरपश्चिम प्रदेश प्रहरी कार्यालय महिला तथा जेष्ठ नागरिक सहायता सेलके इन्चार्ज प्रहरी निरिक्षक धनबहादुर बोहरा भर ऐन निर्माण करेबेर सुरक्षाहेफे ख्याल करे पर्ना बटैलै । छलफलमे सुझाव डेटी उहाँ पीडितहे सुरक्षा चुनौती समेत हुइना करल कहटी प्रहरीके पायक पर्ना स्थानमे पुनस्र्थापना केन्द्र निर्माण हुई पर्ना बटैलै ।
सामाजिक विकास मन्त्रालयके कानून अधिकृत दानबहादुर सुनार भर मानव वेचविखन तथा ओसारपसार नियन्त्रण सम्बन्धी ऐन निर्माणके लाग एक दुई चो छलफल हुइलेसेफे मस्यौदा नइबनल बटैलै । मानव वेचविखन सम्न्धी अल्पकालिन सेव कार्यविपधी निर्माण करके मानव वेचविखन, ओसार पसार एवं महिला हिंसा न्यूनीकरणसंगे पीडितहे सहयोग करटी आइल उहाँ बटैलै । ओस्टेक कार्यविधि अन्तरगत रहिके कञ्चनपुरमे पीडितहे पुनस्र्थापना कैना भवनके लाग जग्गा छनौट समेत हुइल उहा बटैलै । ‘पुनस्र्थापना तथा पीडितके संरक्षणके लाग कञ्चनपुरके भीमदत्त नगरपालिकामे जग्गा प्राप्त हुइल बा, उहाँ कहलै, ‘तत्काल डिपिआर तयार करके भौतिक संरचना निर्माण कैना, ओकर लाग बजेट समेत उपलब्ध सेकल बा ।’
एफ डब्लु एलडीके कार्यकारी निर्देशक अधिवक्ता सविन श्रेष्ठ भर प्रदेश सरकारसे तयार करल अल्पकालिन कार्यविधीमे मावन अधिकार ओसारपसार तथा वेचविखन नियन्त्रण कैना विषय समावेस नइहुइल बटैलै । उहाँ मानव वेचविखन तथा ओसारपसार नियन्त्रणके लाग ऐन निर्माण कैना आवश्यक रहल बटैलै ।
कार्यक्रममे एफडब्लु एलडीके रेणु प्रधान श्रेष्ठ स्वागत मन्तव्य व्यक्त करले रहिट । हाल गण्डकी प्रदेश सरकारसे मानव वेचविखन तथा ओषारपसार सम्बन्धी ऐन निर्माण करके कार्यान्वयन करल उहाँ बटैली । कार्यक्रमके संचालन तथा सहजीकरण एफडब्लु एलडीके विनोद चन्द्र देवकोटा करले रहिट ।
