डिएसपी शाही नगदसहित पुरस्कृत
पहुरा समाचारदाता
धनगढी, ८ अगहन । जिल्ला प्रहरी कार्यालय कैलालीसे ईलाका प्रहरी कार्यालय मालाखेतीमे कार्यरत प्रहरी नायव उपरीक्षक प्रेम बहादुर शाहीहे पुरस्कृत करल बा ।
मंगरके कार्यालयमे एक कार्यक्रमके आयोजना कैटी कैलालीके प्रहरी प्रमुख तथा प्रहरी उपरीक्षक विश्व अधिकारी नगदसहित शाहीहे पुरस्कृत करल हुइट । सुदूरपश्चिम प्रदेशके प्रवेशद्वारमे रहल अति संवेदनशील स्थानके शान्ति सुरक्षा अमन चयन कायम कैना सक्रिय भूमिका निर्वाह करल कहटी जिल्ला प्रहरी कार्यालय कैलालीसे डिएसपी शाहीहे पुरस्कृत करल हो ।
जिल्ला प्रहरी कार्यालय पश्चिम नवलपरासी दरबन्दी रहल शाही एक बरससे इलाका प्रहरी कार्यालय मालाखेतीमे कार्यरत रहल रहिट । जिल्ला प्रहरी कार्यालय कैलालीके अनुसार डिएसपी शाहीके सक्रियतामे टमान मितिमे लागुऔषध बरामद, फरार प्रतिवादी पक्राउ, अवैध सुन बरामद, दुई करोड बरावरके राजश्व छली करल स्टिकर बरामद करल रहे ।
तोकल जिम्मेवारी पूर्ण ईमान्दारी, बफादारी एवं कर्तव्य निष्ठताके साथ प्रशंसनीय एवं अनुकरणीय तवरसे कार्य सम्पादन करल ओरसे डिएसपी शाहीहे नगद एक हजार पाँच सय सहित सम्मान करल जिल्ला प्रहरी कार्यालयका प्रमुख विश्व अधिकारी जानकारी डेलै ।
डिएसपी शाहीसे करल कामके उचित मुल्याङकन कैटी कदर स्वरूप नगद पुरस्कारसे पुरस्कृत करल हो । साथे अन्य प्रहरी कर्मचारीनमे समेत सकारात्मक प्रभाव परल ओ कार्य सम्पादनमे ढिउर टेवा पुग्ना प्रहरी उपरीक्षक अधिकारी विश्वास व्यक्त करलै ।
