हुम्लाके लाग कैलालीसे चाउर पठागैल

पहुरा समाचारदाता
धनगढी, १२ अगहन । भोकमरी हुइना अवस्था आइलपाछे हुम्ला जिल्लाके लाग धनगढीसे स्थलमार्ग होके खाद्यान्न ढुवानी करे लागल बा ।

खाद्य व्यवस्था तथा व्यापार कम्पनी लिमिटेडके धनगढी मोहनपुरस्थित गोदामसे शुकके हुम्लाके लाग ९० क्वीन्टल चाउर पठाइल बा । कम्पनीके क्षेत्रीय प्रमुख एन्जिला बस्नेत हुम्ला सदरमुकाम सिमकोटके लाग ट्रकसे ९० क्वीन्टल चाउर पठाइल जानकारी डेली । हुम्लामे चाउर ढुवानीके ठेक्का पाइल गणेश ढुवानी सेवा शुकके सकारे चाउर लैगिल हो ।

उक्त ढुवानी सेवा अँट्वारके फेन चाउर लैजैना बस्नेत बटैली ।‘ढुवानीके ठेक्का पाइल व्यवसायी थप चाउर इहे अँट्वारके लैजैना कहले बाटै छ ।’ बस्नेत कहली, ‘हुम्लाके लाग निर्धारण करल कोटाके चाउर हमारठन मौजदात रहल बा ।’ खाद्य व्यवस्था तथा व्यापार कम्पनी लिमिटेड धनगढीसे ढुवानी हुइना मेरके इ बरस सिमिकोट ओ हुम्लाके श्रीनगर डिपोके लाग सात/सात सय क्वीन्टल चाउर कोटा निर्धारण करल बा । उक्त चाउर ढुवानी हुइ सेकल नैहो ।

मोहनपुर गोदाममे १६ हजार क्वीन्टल चाउर मौजदात रहल केन्द्रसे अनुमति डेलेसे हुम्लामे आवश्यकताअनुसार चाउर पठाइ सेकजैना क्षेत्रीय कार्यालय जनैले बा । खाद्यान्न अभावसे भोकमरी हुइना अवस्था आइलपाछे हुम्लाके नाम्खा गाउँपालिकाके लिमि क्षेत्रके स्थानीय खाद्यान्नके माग कैटी काठमाडौँ पुगल बाटै ।

खाद्यके धनगढी डिपोमे भर खाद्यान्न मौजदात रहल बा । खाद्यके धनगढी डिपोसे सुदूरपश्चिमके पहाडी जिल्लाके साथे स्थल मार्गसे हुम्ला, मुगु ओ सुर्खेतमे फेन चाउर ढुवानी हुइना करल बा ।