प्रादेशिक नीतिमे अपाङगता सवाल समेटना सुझाव

समाचारदाता
धनगढी,१७ अगहन । सुदूरपश्चिम प्रदेश सरकारसे अपाङगता सम्बन्धी प्रादेशिक नीतिमे अपाङगता रहल नागरिकके सवालहे समेटके प्रादेशिक नीति नन्ना सुझाव डेगिल बा ।

३० औं अन्तर्राष्ट्रिय अपांगता दिवसके अवसरमे सुदूरपश्चिम प्रदेशमे अपांगता मानव अधिकारके अवस्था ओ कानुनी प्रावधानबारे सञ्चार जगत ओ सरोकारवालाहुकनसंगके नीति सम्बाद कार्यक्रम कार्यक्रममे सरोकारवाला निकाय उ सुझाव डेहल रहिट ।

राष्ट्रिय मानव अधिकार आयोग सुदूरपश्चिम प्रदेश प्रमुख मोहनदेव जोशी अपाङगता सवाल समेटके प्रादेशिक नीति नन्ना सुझाव डेहल रहिट । उहाँ कहलै, अपाङगता रहल व्यक्तिफे मर्यादित ओ सम्मानपूर्वक जीवनयापन करे संविधानमे सुनिश्चित करले बा । मागके अधिकार नइपैलेसे विद्रोह करकेफे अधिकार लेहे सेक्ना बा । उहाँ समग्र अपांगता रहल नागरिकके सवालहे सम्बन्धित मन्त्री ओ मुख्यमन्त्री समक्ष पुगैना अपने जिम्मेवारी मै पुरा कैना कहटी प्रतिवद्धता व्यक्त करलै । कार्यक्रममे धनगढी उपमहानगरपालिका सामाजिक विकास शाखाके प्रमुख टंक विष्ट, अपाङगता अगुवा भीम बहादुर शाह, राष्ट्रिय हलिया महासंघके अध्यक्ष इश्वर सुनार, लगागत मन्तव्य व्यक्त करले रहिट ।

कार्यक्रममे सर्वाङिण अपांगता विकास समाजके कार्यकारी निर्देशक नन्दराज भट्ट सुदूरपश्चिम प्रदेश सरकारसे नन्टी रहल अपाङगता सम्बन्धी प्रादेशिक नीतिके प्रारम्भीक मस्यौदामे ढेर बाट नइसमेट बटैलै । पारम्भीक मस्यौदाबारे जानकारी डेटी प्रदेशमे अपाङगता रहल व्यक्तीहुकन तथ्याङक सही नइरहल, रोजागारी, भौतिक पूर्वाधारमे, शिक्षा, सूचना संचार, पुनस्र्थापना लगायत ढेर बाट नइसमेट जनैले रहिट ।

ओस्टेक उहाँ अपांगता रहल व्यक्तिहुकन प्रदेश स्तरीय तथ्यांक अद्यावधिक कैना डिजिटल प्रोफाइल बनाई पर्ना, सक्कु मेरिक अपांगता रहल व्यक्तिहुकनके निशुल्क स्वास्थ्य बिमा लागु हुई पर्ना, अपांगता अवस्था, अध्ययन, अनुसन्धान ओ सेवा विश्लेषण कैना प्रदेश स्तरीय सर्भेक्षण आयोग निर्माण हुई पर्ना माग करले रहिट । प्रदेश भिटरके अति अशक्त, पुर्ण अशक्त, बहिरा, दृष्टिबिहिन, अटिज्म ओ मनोसमाजिक अपांगता रहल व्यक्तिहुकनके लाग पारिश्रमिक सहितके दोभासे ओ व्यक्तिगत सहयोगिके व्यवस्था हुई पर्ना, प्रदेशभिटरके सक्कु श्रोत विद्यालय मर्ज करके एकिकृत समावेशी बहुउद्देश्यीय विद्यालय स्थापना हुई पर्ना माग कैगिल बा । प्रदेश अपांगता सूचना केन्द्रमे साकेतिक भाषा अध्ययन तथा ब्रेल अडियो लाइब्रेरीके स्थापना हुई पर्ना, सांकेतिक भाषा ओ ब्रेल भाषाहे सरकारी मान्यता प्रदान करके सरकारसे दैनिक दस्तावेजमे प्रयोग करे पर्ना माग धारल बा ।

अपांगता पारा स्पोर्ट्स, ऐथ्लेतिक्स संचालन कैना पारा स्पोर्ट्स कभर्डहल निर्माण हुई पर्ना, अपांगता रहल व्यक्तिहुकनके संचार/ईन्टरनेट सेवामे छुट डेहे पर्ना, कोरोनाके लक डाउन प्रभावित अपांगता हुइल व्यक्तिहुकनहे व्यावसायिक तथा कृषि जन्य क्रियाकलाप संचालन कैना बिना धितो ऋणके व्यवस्था हुई पर्ना, सहायक सामाग्री व्हिल्चैर, उज्जर छडी, बैशाखी लगायत उत्पादन, वितरण, मर्मत, थेरापी, मनोपरामर्श सहितके प्रदेश पुनस्र्थापना केन्द्रके स्थापना हुई पर्ना माग करल बा । सामाजिक विकाश मन्त्रालय मार्फत समुदायमे आधारित पुनस्र्थापना कार्यक्रम लागु हुई पर्ना, पिना पानी सहित सार्वजनिक स्थानमे पहुँचयुक्त शौचालय स्थापना हुई पर्ना, नयाँ बन्ना सडक ओ भौतिक संरचनामे व्हिल्चियर डगरे, संकेत ब्लक धारे पर्ना, बैन्किङ तथा वाणिज्य कार्यालय सक्कुहुकनके पहुँचमे रहना नीति अख्तियार हुई कहल बा ।

स्वास्थ तथा परामर्श सेवा सहितके प्रदेश अपांगता आपतकालीन कोष स्थापना हुई पर्ना, प्रदेश लोक सेवा आयोगसे अपांगता रहल व्यक्तिहुकनके लाग अपांगताके आधारसेफे अपांगता गम्भीरताके वर्गीकरण अनुसार विज्ञापन करके पद्पुर्ती करे व्यवस्था करे पर्ना, अपांगता रहल महिलाके लाग अलगे विज्ञापन हुई पर्ना, अपांगता रोजगारी तथा शसक्तिकरण कैना प्रदेशस्तरमे वर्सेनी अपांगता रोजगार सम्मेलन हुई पर्ना, दीर्घकालीन अशक्तता ओ रोगसे ग्रसित अपांगताहे निशुल्क स्वास्थ सामाग्री तथा निशुल्क औषधी उपचारके व्यवस्था हुई पर्ना, अपांगता सम्बन्धी काम कैना संघ सस्थाहुकनहे अपांगता अधिकार ओ अभियान संचालन कैना निश्चित अनुदानके व्यवस्था हुई पर्ना, दीर्घकालीन सीप विकाससंगे घर बार बिहिन तथा असहाय अपांगताके उचित व्यवस्थापन हुई पर्ना, अपांगता वेरोजगार व्यक्तिहुकनके सुची तयार करके सार्वजनिक÷सामुदायिक सरोकारके काममे रोजगारी सिर्जना करके स्वरोजगार बनैना माग करल बा ।

सर्वाङिण अपांगता विकास समाज नेपाल, रिह्याब फाउन्डेसन नेपाल ओ समावेशी पारा एथ्लेटिक्स स्पोर्ट क्लब धनगढीके सयुक्त आयोजना, लुथरन विश्व फेडरेसन नेपाल दिगो विकास समाज भजनी, राष्ट्रिय मुक्त हलिया समाज महासंघ नेपाल, नीडस नेपाल ओ आई एल सेन्टर कैलालीके आर्थिक सहयोगमे कार्यक्रम हुइल रहे ।

कार्यक्रम सर्वाङीण अपांगता विकास समाज नेपालके अध्यक्ष कृष्ण प्रसाद भण्डारीके अध्यक्षता हुइल कार्यक्रममे सहजीकरण समाजके कार्यकारी निर्देशक नन्दराज भट्ट ओ स्वागत मन्तव्य समावेशी पारा एथ्लेटिक्स स्पोर्ट क्लबके अध्यक्ष ईन्द्रं बहादुर पाली करले रहिट । उहे अवसरमे समावेशी पारा एथ्लेटिक्स स्पोर्ट क्लवसे व्हिल्चियर÷ ट्राईसाईकल दौड प्रतियोगिता धनगढीस्थित रंगशालामे हुइल बा । दौड प्रतियोगितामे प्रथम, द्वितीय, तृतीय ओ शान्तवना हुइना प्रतिस्पर्धीहे नगद पुरुस्कार, जर्सी, नीडस नेपालसे सहयोग प्राप्त ४० जनहनहे हाईजिन किट ओ प्रमाणपत्र समेत वितरण कैगिल बा ।

सम्वाद कार्यक्रममे ह्यान्डिक्याप ईन्टरनेस्नलके प्रतिनिधि, संचारकर्मी, बहिरा संघ कैलाली, नेत्रहिन युवा संघ कैलाली, फुलवारी अपांग संघ कैलाली लगायत टमान सरकारी गैरसरकारी संघ सस्था ओ सरकारी कार्यालयके प्रतिनिधिके उपस्थिती रहे ।

सम्बन्धित समाचार

अपांगता रहल व्यक्तिके पीडा सुनुवाइ हुइना जरुरी