सुदूरपश्चिम कांग्रेस प्रदेश कार्यसमिति चयनके लाग मतदान सुरु हुइल
पहुरा समाचारदाता
धनगढी, १८ अगहन । सुदूरपश्चिम कांग्रेस प्रदेश कार्यसमिति चयनके लाग मतदान सुरु हुइल बा । आज (शनिच्चर) बिहान धनगढीस्थित निर्माण व्यवसायी संघ कैलालीके हलमे मतदान सुरु हुइल हो ।
प्रदेश कार्यसमिति चयनके लाग संस्थापन ओ इतरपक्ष प्यानलसहित चुनावी मैदानमे बटैं । प्रदेशमे एक हजार १७ जाने प्रतिनिधि मतदानमे सहभागिता जनैहि ।
सभापतिमे संस्थापन पक्षसे केन्द्रीय सदस्य तथा पूर्वमन्त्री वीरबहादुर बलायर उम्मेदवारी डेले बटैं कलेसे इतरपक्षसे कैलालीके पूर्वसभापति नारायणदत्त मिश्रके उम्मेदवारी परल बा । ओस्टेक संस्थापन पक्षसे प्रदेश उपसभापतिमे कैलालीके जनक चौधरी ओ बैतडीके लोकराज अवस्थी, महामन्त्रीमे कैलालीके नरनारायण शाह ओ अछामके मेघराज खड्का तथा सहमहामन्त्रीमे कञ्चनपुरके चिन्तामणि भट्ट, गोपाल भट्ट ओ अछामके अम्बिका चलाउने उम्मेदवारी डेले बटैं ।
ओस्टेक संस्थापन इतर पक्षसे मिश्र सभापतिमे उम्मेदवारी डेले बटैं कलेसे उपसभापतिमे कञ्चनपुरके गोपाल गुरुङ ओ बाजुराके मानबहादुर रावल, महामन्त्रीमे बझाङके प्रताप गुर्दामी ओ अछामके रामबहादुर शाही, सहमहामन्त्रीमे दार्चुलाके पदमराज पन्त ओ बैतडीके नरेन्द्र भट्ट ओ खिना भण्डारी उम्मेदवारी डेले बटैं ।
