सुदूरपश्चिममे १ हजार ३ मत परल, आजुसे मत गणना
पहुरा समाचारदाता
धनगढी, १८ अगहन । नेपाली काँग्रेसके पहिल प्रदेश अधिवेशनअन्तर्गत सुदूरपश्चिममे नेतृत्व चयनके लाग हुइल मतदान सेकल बा ।
निर्वाचन अधिकृत वीरबहादुर जेठाराके अनुसार मतदानमे १ हजार ३ जना सहभागी हुइल रहिट । सकारे ९ बजेसे सुरु हुूइल मतदान साँझ ४ बजके २० मिनेटमे सेकल निर्वाचन अधिकृत जेठारा बटैलै । प्रदेश मतदानके लाग कूल १ हजार २३ जाने प्रतिनिधि छनौट हुइल रहिट । प्रदेश कार्यसमिति चयनके लाग संस्थापन ओ इतर पक्ष प्यानलसहित चुनावी मैदानमे उटरल रहिट ।
मतगणनाके लाग दुनु पक्षसंग छलफल करके आघे बढन जेठारा बटैले । ५९ जाने सुदूरपश्चिम प्रदेश कार्यसमितिके लाग १ सय ७७ जाने उम्मेदवारी डेहल रहिट । प्रदेश नेतृत्वके लाग संस्थापन पक्षसे काँग्रेसके केन्द्रीय सदस्य तथा पूर्वमन्त्री वीरबहादुर बलायर टिमसहित चुनावमे लरल बटै । ओस्टेक इतर पक्षसे जिविस कैलालीके पूर्वसभापति नारायणदत्त मिश्र टिमसहति चुनाव कुडल बटै ।
संस्थापन पक्षसे प्रदेश उपसभापतिमे कैलालीके जनक चौधरी ओ बैतडीके लोकराज अवस्थी, महामन्त्रीमे कैलालीके नरनारायण शाह (मनु) ओ अछामके मेघराज खड्का तथा सहमहामन्त्रीमे कञ्चनपुरके चिन्तामणि भट्ट, गोपाल भट्ट ओ अछामके अम्बिका चलाउने उम्मेदवारी डेले बटै ।
ओस्टेक करके संस्थापन इतर पक्षसे उपसभापतिमे कञ्चनपुरके गोपाल गुरुङ ओ बाजुराके मानबहादुर रावल, महामन्त्रीमे बझाङके प्रताप गुर्दामी ओ अछामके रामबहादुर शाही, सहमहामन्त्रीमे दार्चुलाके पदमराज पन्त ओ बैतडीके नरेन्द्र भट्ट ओ खिना भण्डारी उम्मेदवार डेले बटै ।
निर्वाचनसे एक सभापति, दुई जाने उपसभापति, एक महिलासहित तीन जाने महामन्त्री चयन हुइही । ओस्टेक करके सदस्य खुलाओर तीन महिलासहित ११ जाने, भूगोलओर प्रत्येक जिल्लासे एक महिलासहित १८ जाने, खस आर्य कोटासे ६ महिला ६ पुरुष करके १२ जाने, आदिवासी कोटासे एक जाने, दलित कोटासे एक महिलासहित तीन जाने, मधेसी कोटासे एक जाने, थारु कोटासे एक महिला ओ दुई खुला करके तीन जाने, मुस्लिमसे एक जाने, अपाङता रहल एक जाने चयन करी ।
