भल्भन्साहे कानुनी मान्यता डेहे परठ; मुख्य मन्त्री भट्ट
पहुरा समाचारदाता
पहलमानपुर, २० अगहन । सुदूरपश्चिम प्रदेश सरकारके मुख्यमन्त्री त्रिलोचन भट्ट थारुसमुदायके अगुवा भन्भन्साहे कानुनी मान्यता डेना कानुनके आवश्यकता रहल बटैले बटै ।
सोम्मार कैलालीके घोडाघोडी तालक्षेत्रमे आयोजित ल्वाड्डी पुजा तथा सांस्कृतिक महोत्सव उदघाटन करटी मुख्यमन्त्री भट्ट उ बाट बटाइल हुइट । अब्बेफे थारु समुदायमे कौनोफे काम करेबेर भल्भन्साहुुकनके सुझावसे कैनाके साथे गाउँक अगुवाई समेत भन्भन्सासे कैना ओरसे कानुनी मान्यता आवश्यकता रहल जनाइल बा ।
मुख्यमन्त्री भट्ट घोडाघोडी ताल धार्मिकपर्यटकसे महत्वपूर्ण रहल बटैटी उ क्षेत्रमे सक्कु समुदायके प्रतिनिधित्व कैना करके सुदूरपश्चिमके भारी मन्दिर निर्माणमे प्रदेश सरकारसे सहयोग कैना प्रतिवद्धता व्यक्त करले रहिट ।
उहाँ सक्कु जातजातीके संस्कृति परम्परा जोगैना प्रदेशसरकार सदैव साथमे रहल बटैलै । साथे उहाँ ल्वाड्डीपुजा तथा सांस्कृतिक महोत्सवके लाग अइना बर्षमे प्रदेश सरकारसे व्यवस्थापनके लाग सहयोग कैना बटैलै । उहाँ थारु समुदायके जेहेन्दार विद्यार्थीके लाग प्राविधिक शिक्षा पढ्न चाहलहुकनके छात्रावृत्तिके व्यवस्था करलफे जानकारी डेलै ।
उदघाटन कार्यक्रममे राष्ट्रिय सभा सदस्य हरीराम चौधरी, कृषी मन्त्री विनिता चौधरी, घोडाघोडी नगरपालिकाके नगर प्रमुख ममता प्रसाद चौधरी, नेकपा माओवादी केन्द्रके नेता नैनसिंह चौधरी, नेकपा एमाले नगर अध्यक्ष बक्त शाही, नेपाली कांग्रेस नगर अध्यक्ष बम बहादुर सिंह लगायत थारु अगुवाहुकनके उपस्थिति रहल रहे ।
हरेक बर्ष बिबाह पञ्चमीके दिनमे कैना उ पुजा विशेष करके नयाँ अन्न अपन देउताहे चढाके पुजा कैना चलन बा कलेसे बली डेना प्रथा समेत रहल बा । उदघाटन कार्यक्रममे थारु समुदायके झाँकी, कला संस्कृति,भेषभुषा ओ थारु परिकारसे स्वागत करल रहे । कार्यक्रम नगर भल्भन्सा बुधराम चौधरीके अध्यक्षतामे हुइल रहे ।
