प्रहरीसे घटनाके नालीवेली सार्वजनिक
आरोपित २१ मन्से १२ पक्राउ, नौ अभिन फरार
पहुरा समाचारदाता
धनगढी, २१ अगहन । जिल्ला प्रहरी कार्यालय कैलाली सोम्मारके रोज भुपेन्द्र बडुवाल हत्या प्रकरणके नालीबेली सार्वजनिक करले बा ।
लम्कीचुहा १ बैठना बर्ष २३ के भुपेन्द्र बडुवालके कार्तिक २३ गते रातके आठ बजके ५२ मिनेटमे टीकापुर न.पा.– १ ब्लक नं. २९ स्थित सिद्धार्थ होटल लग्गे कौशी देवी बिष्टके घरेक आँगनमे धरियार हतियार प्रहार करके हत्या करल रहे । उ घटनामे संलग्न अपराधिक समुहके १२ जनहनमे पक्राउ करल ओ ९ जाने अभिन फरार रहल पत्रकार सम्मेलनमे जिल्ला प्रहरी कार्यालय कैलालीके प्रमुख विश्व अधिकारी जनैलै ।
उ समुहसे वडुवालके पेट ओ छातीके भागमे २ चो, पिठ्युके भागमे ३ चो ओ मुरीक पाछे भागमे एक पटक धरियार हतियार प्रहार करके घाहिल बनाइल हुकहिनहे प्रहरी आठ बजके ५८ मिनेट (६ मिनेट)मे उपचारके लाग प्रहरी टीकापुर अस्पताल लैगिलमे रातके साढे ९ बजे हुकान मृत्यु हुइल रहे ।
पक्राउ परल प्रतिवादी
लम्कीचुहा नगरपालिका –३ चिसापानी बैठना बर्ष २३ के महेश रावल, बर्ष २० के धिरज कना दिपेन्द्र शाही, बर्ष २० के आर्यन देवकोटा, बर्ष १९ के मदन शाही, लम्कीचुहा नगरपालिका वडा नं.१ बैठना बर्ष २२ के कपिल श्रेष्ठ, बर्ष १८ के दिपक, गोलु कना निशान्त मल्ल, वडा नं. ५ बैठना बर्ष २८ के विकास खड्का, टीकापुर न.पा. १ बैठना बर्ष २३ के प्रविण रिमाल, जिल्ला बर्दिया राजापुर न.पा. ७ घर रहल टीकापुर न.पा. १ ब्लक नं. २५ बैठना बर्ष २१ के रोहित आले, ब्लक नं. १४ बैठना बर्ष २५ के सोहन शाह, बर्दगोरिया गा.पा. २ झगढपुर बैठना बर्ष २५ के लोकेन्द्र कुँवर ओ बर्दिया ठाकुरबाबा न.पा. ३ गोदाना बैठना बर्ष २६ के सन्तोष कना सविन जंग शाही रहल बटै ।
घटनामे संलग्न फरार प्रतिवादी
लम्कीचुहा नगरपालिका –३ चिसापानी बैठना बर्ष २७ के नविन रावल, बर्ष २६ के अनुज कना चिरञ्जीबी जंग शाही, बर्ष २६ के हिमाल शाही, जानकी गा.पा. ६ जगतपुर बैठना बर्ष २८ के जयन्द्र शाह, टीकापुर न.पा. १ बैठना बर्ष २७ के बिकास शेरचन, लम्की चुहा ४ बैठना बर्ष २४ के रोशन बहादुर शाही, टीकापुर ६ बैठना बर्ष ३५ के अशोक रावल, लम्की चुहा ३ बैठना बर्ष ३२ के लोक जंग शाही ओ बर्दिया गरुवा गापा ५ बैठना बर्ष २२ के हेमन्त शाही रहल बटै ।
प्रहरीके अनुसन्धान घटना कैसिक हुइल
लम्की, चिसापानी, टीकापुर क्षेत्रमे नदीजन्य पदार्थ तथा वन पैदावारके ठेकापट्टामे अपन बर्चश्व कायम कैना लोकजंग शाही समेतसे युवाहुकनके समूह बनाके अपराधिक लाभके लाग परिचालन कैना करल रहिट कलेसे उ समुहहे अशोक रावल संरक्षण प्रदान कैना करल पत्रकार सम्मेलनमे प्रहरी जानकारी डेहल । शुरुमे एक्के समूहमे रहल जयन्द्र शाह ओ नविन रावल बीच पाछे मनमुटाव तथा आपसी वैमनश्यता उत्पन्न हुइलपाछे दुई समुहके युवा बीच बारबार झै–झगडा हुइटी आइल रहे ।
यी समूहके सदस्यहुकनके विरुद्धमे यी जिल्ला मातहत तथा काठमाण्डौमे समेत ६ ठो ज्यान मर्ना उद्योग ओ २ ठो हातहतियार तथा खरखजाना सम्बन्धी मुद्दा दर्ता हुइल डेखल बा । यिहे क्रममे २०७८ भदौ महिनामे काठमाण्डौके कालीमाटी क्षेत्रमे जयन्द्र शाहके समूहसे नविन रावल समूहके हिमाल शाहीहे पेटमे खुकुरी प्रहार करके मुवैना प्रयास करल रहे ।
तत्पश्चात् कपिल श्रेष्ठसे जयन्द्र समुहके ओरसे नविन रावल ओ निजके समूहउप्पर आक्रमण कैना योजना बनाके २०७८ कार्तिक १७ गते काठमाण्डौसे मोटरसाईकलमे नेंग्के २०७८ कार्तिक २० गते लम्की पुगके मुनमुन होटलमे एक रात बैठके २१ ओ २२ गते बौनिया स्थित अनुकूल होटलमे बैठके नविन रावलहे आक्रमण कैना उपयुक्त अवसरके खोजीमे रहल रहिट ।
कार्तिक २३ गते नविन रावल समेतके समुह लम्कीमे आयोजित फुटबल खेल हेरे आइल पत्ता पाइलपाछे कपिल श्रेष्ठसे अपन समूहहे खबर करके लम्की खेल मैदानमे आक्रमण करे खोजल हुइलेसेफे ओइनके समूह समयमै लम्की पुगे नइसेकल कारण उ ठाँउमे आक्रमण करे नइसेकल रहे ।
मदन शाहीसे उहाँसे पहिले लम्की विद्युत कार्यालय लग्गेक डगरसे टीकापुर नेंगल नविन रावल समेतहे भेटके जयन्द्रके समूह हातहतियार सहित आक्रमणके तयारीमे रहल जानकारी डेहलपाछे नविन रावलसे अपन समूहके (आर्यान, हिमाल, हेमन्त, मदन, चिरञ्जीवी, रोशन, निशान्त, धिरज, रोहित, सोहन, विकास शेरचन) हे रोड साईड क्याफेमे जम्मा करके जयन्द्र समुहके जौनफे व्यक्ति फेला पारके आक्रमण कैना योजना बनैले रहे ।
कपिल श्रेष्ठ ऐक्केली हइलपाछे नयाँ टीकापुर क्षेत्रमे नुक्के बैठल ओ उहाँसे लम्कीमे रहल मिल्न संघरीया भुपेन्द्र बडुवालहे फोन करके अपनहे लेहे बोलाइलपाछे भुपेन्द्र ओइनहे लेहे टिकापुर गैल रहिट ।
यहोर नविन रावलके समूह जयन्द्र समूहके व्यक्तिहे आक्रमण कैना हातहतियार सहित खोजीमे नेंगल रहे । उ समूहमे सबसे आघे उ ठाउँके स्थानीय रोहित आलेसंग आर्यन देवकोटा पहिले स्कुटीमे, हुकान पाघे दुसर स्कुटीमे चिरञ्जिवी शाही ओ रोशन शाही ओ निजहुकनसे पाछे नविन नविन रावल समेत निकरल रहिट ।
टिकापुरके जमरा पुल लग्गेक आर्यन देवकोटा समेतसे भुपेन्द्र बडुवालहे फेला पारके हमार विरुद्ध टिकापुरमे आइल हो कहिके ईवी लेके करीव २ कि.मि.सम लखेटी सिद्धार्थ होटल लग्गे पुगाइलपाछे भुपेन्द्र बडुवाल मोटरसाइकल छोरके आफन्तके घर ओर जाइबेर पाछेसे रखेटी आर्यन देवकोटा, चिरञ्जीवि शाही, रोशन शाही ओ रोहित आले समेतसे कौशीदेवी विष्टके घरके पेटीमे भुपेन्द्र बडुवालहे नियन्त्रणमे लेके पेट ओ छातीके भागमे २ चो, पिठ्युके भागमे ३ चो मुरीक पाछे भागमे एक चो धरियार हतियार प्रहार करके भागल रहिट ।
हत्यामे संलग्न प्रतिवादीहुक्रे लग्गे रहल विष्ट आयल स्टोर लग्गे पुगके भग्ना योजना अनुसार खुकुरी उहे ठाउँमे फेकल ओ रोहित आलेहे अपन घरओर जैना कहिके पठाइल रहे ।
नविन रावल, हेमन्त शाही, हिमाल शाही, रोशन शाही, चिरञ्जिवी शाही ओ आर्यन देवकोटा पशु हाट बजारके डगर हुइटी जोशीपुर पुगके एक जाने अपराध स्वीकर्ना ओ और भागके फरार रहना योजना अनुसार कार्तिक २४ गते सकारे बौनिया बजारमे पुगके अपराध अपने केल करल हु कना पर्ना आर्यन देवकोटा बौनिया बजारमे रहल ओ नविन रावल, हेमन्त शाही, हिमाल शाही, रोशन शाही, ओ चिरञ्जिवी शाहीहुक्रे लोकजंगसे बनाइल योजना अनुरुप लोकेन्द्र कुँवरसे बौनिया बजारसे उत्तरके चायाँभावर गाउँमे लैजाके एक स्थानीयके घरेम नुकछिपके बैठल रहिट ।
लोकजंगके योजना अनुरुप चायाँ भावर गाउँमे रहल फरार प्रतिवादीहुकनहे खैना बैठना व्यबस्थापन कैना, खर्च रकम डेना ओ २५ गते ओइनहे भगैना सविन जंग शाहीसे कार भाडामे लेके चायाभावर जाके ओइनहे उ कारमे जुगेडासम नानल रहे ।
लोकजंगसे २६ गते भारतीय बलेरो जीप भाडामे व्यवस्था करके नविन रावल समेतहे भारतके ढकिया गाउँसम पुगाके अपने लौटके अइलै ।
नविन रावल समेतसे प्रयोग करल २ ठो मोटरसाईकल लोकेन्द्र कुँवरसे बौनियामे नानके नम्बर प्लेट चेन्ज करे लगाके बर्दिया भुरीगाउँ स्थित रोयल एडभेन्चर रिसोर्टमे नुका छिपाके धारल रहिट ।
काार्तिक २६ गते सकारे सबिनजंग शाहीसे नविन रावल समेतहे भारतओर पठा सेकलपाछे ओइनके थान–५ मोबाईल अपने लेके उ मोवाईल नुका छिपा रख्ना बनबेहेडा बैठना डेबिड चन्द्र कडायतहे डेहल रहे ।
प्रतिवादीहुकन कैसिन सजाय
नविन, धिरज, आर्यन, मदन, निशान्त, विकास, प्रविण, रोहित, सोहन, चिरञ्जीवी, हिमाल, विकास खड्का, रोशन, अशोक ओ हेमन्त शाहीहे मुलुकी अपराध संहिता २०७४ के दफा १७७ (२) बमोजिम हुइना सजाय (जन्म कैद) मे उहे संहिताके दफा ४१ (जीवित रहटसम) बमोजिम कैद सजाय । दफा १७७ (१) बमोजिमके कसुरमे सजय हुइना बा ।
लोकजंग शाही, महेश रावल, कपिल श्रेष्ठ ओ जयन्द्र शाहहे दफा १७७ (२) बमोजिम (जन्म कैद) सजाय । दफा १७७ (१) बमोजिमके कसुर सजय हुइना बा
लोकेन्द्र कुँवर ओ सविनजंग शाहीहे दफा ३६ (३) (क) बमोजिम कसुर करल उ सरह जन्म कैदके सजाय, दफा ३६ (१) ओ (२) के कसुरमे सजय हुइना बा । दफा १८६ बमोजिम प्रतिवादीसे जाहेरवालाहे मनासिव क्षतिपूर्ति हुइना जिल्ला प्रहरी कार्यालय कैलालीके प्रहरी प्रमुख अधिकारी जनैलै ।
