सुदूरपश्चिम महोत्सव हुइना
पहुरा समाचारदाता
धनगढी, २४ अगहन । विगत २०६३ सालसे हुइटी आइल ’सुदूरपश्चिम महोत्सव’ इ बरस लग्ना हुइल बा ।
कोभिड–१९ के जोखिमके कारण दुई बरससे हुइ नैसेकल सुदूरपश्चिम महोत्सव इ बरस आयोजना हुइना कैलाली उद्योग वाणिज्य संघके अध्यक्ष पुष्पराज कुँवर बटैलै । यकर लाग आयोजक कैलाली उद्योग वाणिज्य संघ तयारी समेत करे लागल अध्यक्ष कुँवर बटैलै ।
हरेक बरस अगहन २२ गतेसे पुस २ गतेसम आयोजना हुइना महोत्सव इ बरस पुस वा माघ महिनामे लगैना स्थानीय प्रशासन, व्यवसायी ओ सरोकारवालासंग छलफल हुइटी रहल अध्यक्ष कुँवर बटैलै ।
ओस्टके कैलाली उद्योग वाणिज्य संघके वरिष्ठ उपाध्यक्ष पुष्कर ओझा महोत्सव लगाइक लाग अनौपचारिक रुपमे छलफल सुरु करल जानकारी डेलै । उहाँ देशको टमान स्थानमे अब्बे फेन महोत्सव चल्टी रहल बटैटी अपनेहुक्रे फेन महोत्सव लगैना तयारी करल बटैलै ।
कोभिड–१९ के टिसरा भेरिएन्ट समेत डेखल कहटी सरकारसे मेला, महोत्सव, सभा, सम्मेलन नैकैना आग्रह करल रलेसे फेन स्वास्थ्यके मापदण्ड अपनाके महोत्सव लगैना आवश्यक रहल यहाँके व्यवसायी बटैले बाटै ।
महोत्सवसे व्यवसायहे किल नैहोके यहाँके कला, साहित्य ओ संस्कृतिहे समेत टेवा पुगैटी आइल बा ।
