माओवादी केन्द्रके प्रथम सम्मेलन आजसे सुरु
पहुरा समाचारदाता
धनगढी, २५ अगहन । नेकपा माओवादी केन्द्र सुदूरपश्चिम प्रदेशके प्रथम सम्मेलन आजसे धनगढीमे सुरु हुइटा । ७ ठो प्रदेशमे एकसाथ नेकपा माओवादी केन्द्रके प्रदेशस्तरीय प्रथम सम्मेलन हुइटा ।
सम्मेलनहे नेकपा माओवादी केन्द्रके अध्यक्ष पुष्पकमल दाहाल ‘प्रचण्ड’ काठमाडौंसे भर्चुल माध्यमसे उद्घाटन करना कार्यक्रम बा । सम्मेलनमे निर्वाचित ६ सय ओ अन्यसमेत कैके १ हजार १९७ जाने प्रतिनिधिके उपस्थिति रहना माओवादी पार्टी शुकके रोज धनगढीमे पत्रकार सम्मेलन कैके जानकारी डेले बा । उ प्रतिनिधि २२३ सदस्यीय प्रदेश कार्यसमिति चयन करि ।
प्रतिनिधि सहभागी हुइना प्रदेश अधिवेशनके सक्कु तयारी पुरा हुइल माओवादी केन्द्र सुदूरपश्चिमके इञ्चार्ज खगराज भट्ट बटैलैं । भट्ट आगामी चुनावसे माओवादी एक नम्बरके पार्टी बनेक लाग आघे बह्रल बटैलैं ।
नेता भट्ट माओवादी आब २०६४ वरपरके माओवादी बन्ना दिशाओर लागल जिकिर करलैं । ‘यी १२ वर्षके बीचमे माओवादी लराई, फुट सब व्यहोरी सेकल’, इञ्चार्ज भट्ट कलैं, ‘आब हम्रे औरे पार्टीसे ढेर संगठित ओ एकीकृत बटि ।’
सुदूरपश्चिम प्रदेशके प्रथम सम्मेलनके लाग टमान उपसमिति काम करटिरहल पत्रकार सम्मेलनमे जनागिल बा । नेकपा माओवादी केन्द्रके बिफेक रोज बैठल स्थायी कमिटीके बैठकसे कार्यसमितिमे पदाधिकारी ओ सदस्य संख्या बह्रैना निर्णय करले रहे ।
