७२ जाने घर दैलोमे पैलै खोप सेवा
पहुरा समाचारदाता
धनगढी, ४ पुस । कैलाली जिल्लाके भजनी नगरपालिका स्वास्थ्य शाखाके समन्वयमे नगरपालिका–१ से ९ समके पुर्णअशक्त ओ अतिअशक्त अपांगता रहल ७२ जाने नागरिक घर दैलोमे कोरोना विरुद्धके खोप पैले बटै ।
कर्डएड, लुथरन विश्व फेडरेसन नेपाल, दिगो विकास समाज भजनी ओ सर्वाङिण अपांगता विकास समाज नेपालके सयुक्त साझेदारीमे अशक्त ओ असहाय पुर्ण अपांगता नागरिकहे सेवा डेहल उ कार्यक्रमके प्राविधिक सहजकर्ता नन्दराज भट्ट जानकारी डेलै ।
३ दिन ९ वडामे निरन्तर अभियान संचालन करके २०० जाने असहाय अपांगता रहल नागरिक लाभान्वित हुइना लक्ष्य राखल बा । उ खोप अभियान पुस २ गते दिन भजनी नगरपालिका स्वास्थ्य शाखा प्रमुख कैलास चौधरी ओ सर्वाङिण अपांगता विकास समाज नेपालके कार्यकारी निर्देशक नन्दराज भट्ट ओ फिल्ड सहज कर्ता ईन्द्र बहादुर पालीसे सुरुवात करल रहिट ।
कार्यक्रममे नगरपालिका स्वास्थ्य शाखा प्रमुख, महिला विकास शाखा प्रमुख, दिगो विकास समाजसे जनताके घर दैलोमे पुगके खोप सेवा डेना अभियान सह्रानिय ओ प्रशसनिय रहल बा ।
खोप केन्द्रमे लक्षित वर्गहे लक्ष्य करल अनुसार खोप लगाई नइसेकल अवस्थामे यी अभियानसे जनताहे घर दैलोमे सेवा डेना महान तथा अनुकरनिय कार्य रहल कहटी अगामी दिनके सहयोग कैना शाखा प्रमुख कैलास चौधरी प्रतिबद्धता व्यक्त करलै ।
