लाखौं रकम सहित एक भारतीय नियन्त्रणमे

पहुरा समाचारदाता
धनगढी, ८ पुस । जिल्ला प्रहरी कार्यालय कैलालीसे श्रोत नैखुलल् लाखौँ रकम सहित एक जाने भारतीयहे नियन्त्रणमे लेले बा ।

बुधके साँझ कैलालीके धनगढीसे भारतके पलिया ओर जैटी रहल भारतके लखिमपुर खिरी ग्राम पञ्चायत पलिया थाना सिलैया बैठुइया २७ वर्षीय नीरज कुमार राजपूतहे नेपाली १८ लाख २७ हजार रुपैयाँ सहित नियन्त्रणमे लेहल जिल्ला प्रहरी कार्यालय कैलालीके प्रवक्ता प्रहरी नायब उपरीक्षक वेदप्रकाश जोशी बटैलै ।

प्रहरी शंकास्पद अवस्थामे डेखलपाछे चेकजाँच करेबर उक्त परिणामके रकम फेला पारल प्रवक्ता जोशी बटैलै । पक्राउ परल राजपूत उक्त रकमके श्रोत बटाइ नैसेकलपाछे नियन्त्रणमे लेहल बटैलै ।

नियन्त्रणमे लेहल राजपूतहे आवश्यक अनुसन्धानके लाग राजश्व कार्यालय कोहलपुर पठैना जोशी बटैलै । नियन्त्रणमे रहल भारतीय धनगढीके टमान व्यापारीनसे समान डेहल बापत जम्मा करल रकम लेके जैटी रहल अवस्थामे पक्राउ परल श्रोत जानकारी डेले बा ।