डब्लूएचआरके अध्यक्षमे कविता पाँणे
पहुरा समाचारदाता
काठमाडौं, ११ पुुस । मानव अधिकारके लाग महिला एकल महिला समूह (डब्लूएचआर) के अध्यक्षमे कविता पाँणे निर्वाचित हुइल बटी ।
डब्लूएचआरके ९ गतेसे सुरु हुइल पाँचौ महाधिवेशनके दुसरा दिन नयाँ नेतृत्व चयनके लाग हुइल मतदानसे अध्यक्षमे पाँणे निर्वाचित हुइल रहिट । अध्यक्षके लाग बाँकेके शोभा गौतम ओ पाँणेबीच प्रतिस्पर्धा हुइल रहे ।
ओस्टेक उपाध्यक्षमे विमला पराजुली ओ रेखा अधिकारीबीच हुइल प्रतिस्पर्धामे विमला पराजुली निर्वाचित हुइल बटै । महासचिवके लाग प्रतिभा बिष्ट ओ बिष्णुमाया पाण्डेबीच हुइल प्रतिस्पर्धामे बिष्णुमाया पाण्डे निर्वाचित हुइल बटै ।
सचिवमे एकमाया विश्वकर्मा ओ मायादेवी शर्माबीच हुइल प्रतिस्पर्धामे एकमाया विश्वकर्मा ओ कोषाध्यक्षमे सृजना श्रेष्ठ निर्वाचित हुइल बा । ओस्टेक सदस्यमे शान्ति महर्जन, सविता महर्जन, भगवती हमाल, शान्ति पासवान ओ मिना अधिकारी निर्वाचित हुइल बटै ।
