बालविवाह न्यूनीकरणके लाग विद्यार्थीहुकनसँग अन्तरक्रिया

पहुरा समाचारदाता
राजापुर, १८ पुस । विद्यमान बालविवाह न्यूनीकरणके लाग नेपाल राष्ट्रिय माध्यमिक विद्यालयके विद्यार्थीहुकनसँग अन्तरक्रिया कार्यक्रम हुइल बा । कार्यक्रम राजापुर नगरपालिकाके वडा नम्बर २ स्थित नेपाल राष्ट्रिय माविमे हुइल हो ।

कार्यक्रममे अधिवक्ता महादेव चौधरी सहजीकरण करटि बालविवाह हुइनाके कारण, विवाह पश्चात हुइना शारीरिक ओ मानसिक समस्या, विवाह करेिबेर अइना कानूनी समस्याके बारेमे जानकारी करैले रहैं । उ बारे जानकारी प्रस्तुत करलपाछे विद्यार्थीहुक्रे अपन जिज्ञासा ढरले रहैं ।

ओस्टेक, ईलाका प्रहरी कार्यालय राजापुरके प्रहरी हवल्दार राम पुजाली लागूऔषध दुर्व्यसनके साथे ट्राफिक नियमके बारेमे जानकारी करैले रहैं ।

युनिक नेपालके अध्यक्ष प्रिमबहादुर थारुके अध्यक्षतामे हुइल कार्यक्रममे बालविवाहसे किशोर ओ किशोरीहुकनमे मानसिक ओ शारीरिक समस्या नन्ना किल नैहोके यिहिनसे स्वस्थ समाज निर्माणमे फेन असर पुगैना हुइल ओरसे बालविवाह नैकरे परना ओ नैडेहेक लाग सबजाने सचेतना फैलैना आवश्यक रहल बटैलैं ।