वनदेवी सहकारी संस्थाके आठौं वार्षिक साधारण सभा
पहुरा समाचारदाता
हसुलिया, २५ पुस । कैलालीके कैलारी गाउँपालिका–१, हसुलियामे रहल वनदेवी कृषि सहकारी संस्था लिमिटेडके आठौं वार्षिक साधारण सभा शनिच्चरके रोज हुइल बा ।
सहकारीके उद्घाटन नेपाली काँग्रेसे प्रदेश सदस्य राजसमझ चौधरी करल रहिट । कार्यक्रममे सम्बोधन करटी उहाँ सहकारी संस्था कृषि क्षेत्रमे सहयोग करटी आइल बटैलै । वनदेवी कृषि सहकारी यान्त्रिकरण, औद्योगिकरण सम्बन्धी कार्यक्रम करटी आइल उहाँ बटैलै ।
कैलारी गाउँपालिक– ६ के अध्यक्ष प्रेमबहादुर चौधरी गाउँपालिका भिटर ४६÷४७ ठो सहकारी पुगल जनैलै । उहाँ कहलै, सहकारी खोल्न क्रम बह्रटी गिलेसे प्रति व्यक्ति ५÷५ शेयर सदस्य बना अवस्था आईसेकी । कृषि क्षेत्रके विकासके लाग सक्कु सहकारी मिल्के बरवार योजना बनाइ सेकजिना बाट उहाँ बत्वाइल रहिट ।
प्रधानमन्त्री कृषि आधुनिकीकरण परियोजना कार्यान्वयन इकाइ धनगढी कैलालीके संयोजक रमेश चौधरी सहकारी औद्योगिकरण, यान्त्रिकरण क्षेत्रओर अग्रसर हुइल ओरसे यिहीसे कृषि पेशामे रहल किसानहुकन बहुट सहयोग हुइना बाट बटैलै ।
संस्थाके अध्यक्ष इच्छा चौधरी दुई लाख ५४ हजार ३६ रुप्या बराबरके नाफा हुइल आर्थिक प्रगति हुइल बटैली । उहाँ आ.व.२०७७/०७८ मे एक करोड ३१ लाख २४ हजार सात सय २४ रुप्या बराबरके आर्थिक कारोबार जनैली । सहकारी खोल्न क्रम जारी रहलेसे फेन सहकारी सम्बन्धी कार्यविधि, कार्यनीति बन्लेसे फेन सक्कुहुन जानकारी नइरहल अध्यक्ष बटैली ।
संस्थाके प्रबन्धक सुरेश चौधरी वनदेवी सहकारी विगत एक बरससे २५ विगाहमे गोहुँ विजवृद्धि कार्यक्रम, टिना खेती, धान, मकै खेती प्रविधि सम्बन्धी तालिम, मसुरो खेती प्रदर्शनी स्थल निर्माण, कार्यक्रम अनुगमन तथा निरीक्षण, युवा तथा साना स्वरोजगार कार्यक्रम, होजियारी उद्योग स्थापना तथा सञ्चालन कार्यक्रम, मसुरो विऊ उत्पादन प्रविधि विकासलगायतके काम करटी आइल बटैलै ।
कार्यक्रममे नथुनिया शिव बाबा कृषि सहकारी संस्थाके अध्यक्ष खगेन्द्र चौधरी, पारदर्शी महिला बहुउद्देश्यीय कृषि सहकारी संस्थाके व्यवस्थापक कौशी बोहरा, वडा नं. ९ के समाजसेवी गरिबदास चौधरीलगायतके शुभकामना मन्तव्य व्यक्त करल रहिट ।
कार्यक्रम सञ्चालन संस्थाके कोषाध्यक्ष सुनिता चौधरी करले रहिट कलेसे स्वागत मन्तव्य सञ्चालक समितिके सदस्य महासिंह कामी करले रहिट ।
वार्षिक साधारणसभा कार्यक्रममे समाजसेवी, बुद्धिजीवि, सेयर सदस्य, राजनीतिक दलके प्रतिनिधिहुकनके उपस्थिति रहल रहे ।
