८ करोड ५४ लाख निक्षेप संकलन
पहुरा समाचारदाता
धनगढी, २५ पुस । धनगढी उपमहानगरपालिका वडा नम्बर ५ तारानगरस्थित हिमशिखर बहुउद्देश्यीय सहकारी संस्था लिमिटेड ८ करोड ५४ लाख ७९ हजार ९ सय ५२ रुप्या ढेर निक्षेप संकलन करले बा । जौन गत बरससे तुलनामे ७६.७३ प्रतिशत ढेर हो ।
धनगढीमे अँट्वारके रोज निम्जल १३ औं वार्षिक साधारण सभामे संस्थाके अध्यक्ष दुर्गाप्रसाद भण्डारी आर्थिक वर्ष २०७७/०७८ के वास्तविक आयव्यय विवरण तथा प्रस्तावित आयव्यव विवरणसहित वार्षिक प्रतिवेदन प्रस्तुत करटि यी आर्थिक वर्षमे ८ करोड ५४ लाख ७९ हजार ९ सय ५२ रुप्या निक्षेप संकलन करल जानकारी करैलैं ।
सहकारी संस्थाके आर्थिक वर्ष २०७६/०७७ मे २८ करोड १८ लाख ६० हजार २ सय ८३ रहलमे यी आर्थिक वर्ष ७६.७३ प्रतिशत निक्षेप ढेर होके ३६ करोड ७३ लाख ४० हजार २ सय ३६ पुगल बा । सहकारी यी आर्थिक वर्षमे ५५.५४ प्रतिशत आम्दानी कैके ६ करोड ९० लाख १२ हजार ५ सय ४६ रुप्या पुगैले बा । आर्थिक वर्ष २०७६/०७७ मे सहकारीके ४ करोड ४३ लाख ६७ हजार ९ सय ७६ रुप्या रहल रहिट ।
हिमशिखर सहकारी यी वर्ष १४ करोड २० लाख ५७ हजार ६ सय ७३ रुप्या ऋण लगानी करले बा । यीसँगे सहकारीके ऋण लगानी ४३ करोड १४ लाख ५८ हजार २ सय ९७ पुगल बा ।
सहकारीके अध्यक्ष भण्डारीके अनुसार यी वर्ष ३७ लाख ७० हजार ८०० सय शेयर पुँजी लगानी हुइल बा । यीसँगे सहकारीके शेयर पुँजी १७.३४ से बृद्धि होके २ करोड ५५ लाख १२ हजार ५ सय पुगल बा ।
ओस्टेक, सहकारीके अध्यक्ष भण्डारी सदस्यहुकनके अपेक्षाहे सम्बोधन करना उद्यमशीलता विकासके साथे संस्थाके नेतृत्वपंक्ति ओ व्यवस्थापनके क्षमता विकास करेक लाग प्रदेश सरकार, स्थानीय सरकार, राष्ट्रिय सहकारी बैंक, आरएमडीसी, जिल्ला सहकारी संघसंग सहकार्य करटि रहल बटैलैं । उहाँ यी मेरिक सहकार्य अगामी दिनमे समेत निरन्तरता डेना योजना रहल बटैलैं ।
सहकारीके वार्षिक साधारण सभाके भौतिक पूर्वाधार विकासमन्त्री दीर्घबहादुर सोडारी एक समारोहके बीच उद्घाटन करले रहैं । कार्यक्रमके उद्घाटन करटि भौतिक पूर्वाधार विकासमन्त्री सोडारी सहकारीके शेयर सदस्यहुकनके अपेक्षा अनुसार संस्थाहे सशक्त बनाइ परनामे जोड डेलैं ।
उहाँ सहकारीके माध्यमसे शेयर सदस्यहुकनहे लागनी लगाइक लाग ऋण खेलैना, बचत करना सहज हुइल बटैलैं ।
उ अवसरमे सहकारीहे महत्वपूर्ण योगदान डेहल व्यक्तित्वहुकनहे नगदसहित सम्मान करले बा ।
वार्षिक साधारण सभाके अवसरमे सहकारीके उत्कृष्ट कर्मचारी पिंयका जोशी, पत्रकार डा. पुस्करराज भट्ट, जेष्ठ नागरिक सीतादेवी बम, बालमिकी शर्मा, असल ऋणी भोजराज पडाल ओ उत्कृष्ट बचतकर्ता चित्रा जोशीहे सम्मान करल रहे ।
यिहिनसे आघे १४ औँ वार्षिकोत्सवके अवसरमे सहकारी संस्था असाहय नागरिकहुकनहे खाद्यान्न ओ नगद सहयोग करले रहे । सहकारी शुकके रोज धनगढीमे रहल दृष्टि फाउन्डेसनहे खाद्यान्न हस्तारण करले रहे ।
सामाजिक उत्तरदायित्व अन्तर्गत संस्था ८ हजार ६ सय बराबरके खाद्यान्न ओ ५ हजार एक सय ५५ रुप्याँ नगद डेहल संस्थाके हसुलिया शाखा प्रबन्धक युवराज जोशी जानकारी डेलैं ।
उ खाद्य सामग्री ओ नगद संस्थाके अध्यक्ष दुर्गाप्रसाद भण्डारी दृष्टि फाउन्डेसनके सदस्य तुलसी भट्टहे हस्तान्तरण करले रहैं ।
कार्यक्रममे कृषि ज्ञान केन्द्र धनगढीके प्रमुख खगेन्द्रप्रसाद शर्मा, जिल्ला सहकारी संघके अध्यक्ष फणि सापकोटा, सहकारी अभियन्ता भोज बमलगायत मन्तव्य व्यक्त करले रहैं ।
संस्थाके उपाध्यक्ष रोशन सिंहसे स्वागत करल कार्यक्रमके सञ्चालन सचिव विमलकुमार जोशी करले रहैं । कार्यक्रम संस्थाके अध्यक्ष दुर्गाप्रसाद भण्डारीके अध्यक्षतामे हुइल रहे ।
