सुचीहे थप चार वर्ष जेल
काठमाडौं, २६ पुस । म्यानमारके प्रजातन्त्रवादी नेतृ आङ सान सुचीहे थप ४ वर्ष जेलसजाय सुनागैल बा । यीआघे उहाँउप्पर लगाइल चारठो आरोपमे दोषी ठहर करटि म्यानमारके सैनिक अदालत उहाँहे थप चार वर्ष जेलसजाय सुनाइल हो ।
उहाँहे बिनालाइनसेन्सके ‘वाकी टकी’ ढरल आरोपमे दुई वर्ष ओ कोरोना भाइरसके कारण लगाइल प्रतिबन्ध उल्लंघन करल आरोपमे दुई वर्ष कैके चार वर्ष जेलसजाय सुनाइल अन्तर्राष्ट्रिय समाचार संस्था अलजजीरा जनैले बा ।
गैलमहिना उहाँहे कोभिड–१९ के मापदण्ड उल्लंघन करल आरोपमे चार वर्ष जेलसजाय सुनाइल रहे । पाछे म्यानमारके सेना प्रमुख मिन आङ ह्लाइङ दुई वर्ष सजाय घटाके दुई वर्षकिल जेलसजाय तोकल रहे ।
सैन्य ‘कू’ करलपाछे गैल वर्ष फेब्रुअरी १ मे सेना ७६ वर्षीया सुचीके घरमे तलासी लेहलमे बिना लाइसेन्सके वाकी टकी फेला परले रहे ।
उहाँउप्पर दर्जनसे ढेर आरोप लागल बटिन । सुची भर उ सब आरोप कपोकल्पित रहल कटि अप्ने उहिनहे अस्वीकार करले बटैले बटि ।
