विद्यालयमे कोरोना खोप अभियान सुरु
पहुरा समाचारदाता
धनगढी, १७ माघ । कैलाली जिल्लाके १३ स्थानीय तहके विद्यालयमे कोभिड–१९ विरुद्धके खोप पहिल खोप लगैना अभियान सुरु हुइल बा ।
भजनी नगरपालिकाके विद्यालयसे आज (सोम्मार)से कोरोना खोप लगैना अभियान सुरु कैसेक्ले बा कलेसे और स्थानीय तहके विद्यालय भर काल्ह (मंगरके रोज) सुरु कैना स्वास्थ्य कार्यालय कैलाली जनैले बा ।
स्वास्थ्य कार्यालय कैलालीके खोप सुपरभाइजर प्रदीप जोशी १३ स्थानीय तहमे रहल विद्यालयमे खोप पुगासेकल बटैलै । १२ से १७ बरस उमेर समूहके सामुदायिक ओ संस्थागत विद्यालयमे अध्ययनरत रहल बालबालिका ओ विद्यालय नइजैना उहे उमेरके लर्कनहे खोप अभियान सुरु करे उहाँ बटैलै ।
अब्बे एक लाख ११ हजार डोज आइल बा, एक डोजमे १० जनहन पुगठ, उहाँ कहलै, अब्बे पठाइल डोजसे सक्कु बालबालिकाहुकन पहिल मात्र पुगजाई । अपुग हुइलेसे फेरसे माग अनुसार फे पठाब ।’ स्थानीय तहके डेहल तथ्याङक अनुसार खोप पठाइल खोप सुपरभाइजर जोशी बटैलै ।
ओस्टेक जोशीपुर गाउँपालिकाके स्वास्थ्य शाखा प्रमुख टेकबहादुर हमाल अपनेहुक्रे माघ १९ गतेसे विद्यालयमे खोप अभियान सुरु करेलागल बटैलै । यिहे माघ १९ गते केदारनाथ मावि, खरैनी प्रावि, हेभन गार्डेन विद्यालयके बालबालिका मोहन्याल मावि जोशीपुरमे खोप लगैना कहल बा ।
माघ १९ गते दिप ज्योति बोर्डिङ, यूनिक बोर्डिङ के बालबालिका जनप्रकास माविमे, मुक्तकमैया प्राविके बालबालिका जनजागृति मावि बन्जरिया, लाइफ लाइन एजुकेशन होमके बालबालिका, कृष्णशमसेर निमावि सिमराना, कैलास इङलिस बोर्डिङ, ब्राइटफयूचर पब्लिक स्कुल, सर्जन मेमोरियल बोर्डिङ, रघुनाथ बहुमुखी क्याम्पस, जनता आ.वि लोहागड, वि.पि स्मृतिके विद्यार्थी माघ १९ गते कोरोना खोप लगैना स्वास्थ्य शाखा प्रमुख हमाल बटैलै ।
ओस्टेक माघ २० गते सिद्धार्थ, होलिल्याण्ड बोर्डिङके विद्यार्थी, विपि प्रावि पिपरकोटी, अनुग्राम पाठशाला, बेताल मोहन्याल आ.वि घुसरी,छोटेलाल स्मृति प्रावि लककड, ग्रीनलाइट एकेडेमी, न्यु एन्थेसिस, शान्ति प्रावि, रामजानकी प्राविके बालबालिका खोप लगैना कहल बा ।
ओेस्टेक माघ २१ गते छुटल सक्कु जनहनहे स्वास्थ्य संस्थामे खोप अभियान संचालन करे लागल हमाल बटैलै ।
