घुम्ती कोषके रकमसे स्वरोजगार बन्टी
सागर कुस्मी
कृष्णपुर, ६ फागुन । कञ्चनपुर जिल्ला कृष्णपुर नगरपालिका–६, बन्जरिया गाउँसे जोरल महाकाली सामुदायिक वन उपभोक्ता समूहमे आवद्ध रहल कम आयस्रोत उपभोक्ता लोगनके दैनिक गुजारा चलाइक लाग घुम्ती कोष सञ्चालन हुइल बा ।
सामुदायिक वनसे वन पैदावार विक्रीवितरण करल आम्दानीके निश्चित स्रोत महिला सशक्तीकरण, उद्यम विकास, गरिबी न्यूनीकरणके लाग बीउ पूँजीके व्यवस्था कैके घुम्तीकोष सञ्चालन हुइल हो ।
घुम्तीकोष मार्फत व्यावसायिक करक लाग ७२ जाने सामुदायिक वनके न्यून आयस्रोत हुइल किसानन ऋण पूजीँ डेहल सामुदायिक वनके अध्यक्ष वीरबहादुर राजवंशी बटैलैं । हुँकार जनाइल अन्सार ऋण पूँजी लेहल मनसे ३० जाने बंगुरपालक लाग प्रतिव्यक्ति २० हजारसे ४० हजारसम ऋण लेले बटैं ।
ओस्टेके, भैँसीनियाँ पालक लाग ९ जाने प्रतिव्यक्ति ३५ हजारके दरसे, छेग्री पालक लाग १५ जाने ३० से ३५ हजारके दरसे, मुर्गी पालक लाग ४ जाने ३५ हजारके दरसे, मछ्छी पालक लाग २ जाने ३५ हजारके दरसे ओ बक्टी पालक लाग एकजाने ३५ हजारके दरसे रकम ऋणके रुपमे लेले बटैं ।
अस्टेके, पसल सञ्चालनके लाग पाँच जाने ३५ हजारके दरसे, तरकारी खेतीके लाग दुई जाने ३० हजारके दरसे, केरा खेतीके लाग एकजाने ३५ हजार, फलफूल पसल सञ्चालनके लाग दुईजाने ३५ हजारके दरसे ओ मोबाइल पसल सञ्चालनके लाग एकजाने ३५ हजार ऋण लेहल अध्यक्ष राजवंशी बटैलैं ।
घुम्तीकोषसे ऋण लेहल व्यवसाय कर्टी रहल मनैंनहे घुम्तीकोष परिचालन कार्यविधि–२०७८ अन्सार रकम लगानी कैगैल बा । घुम्तीकोषसे लेहल ऋण व्यावसायिक काम कैना विपन्न ओइनहे पाँच, मध्यमहे सात ओ सम्पन्नहे नौ प्रतिशत ब्याज रकम टिरे पर्ना नियम बा । ऋण लगानी करल रकमकके व्याज हरेक महिना बुझाइ पर्ना व्यवस्था कैल बा ।
‘लगानी रकम विपन्न वर्गहे छ महिना, मध्यम वर्गहे चार महिना, सम्पन्न वर्गहे दुई महिनासम टोल समितिमार्फत डेले बटि, अध्यक्ष राजवंशीले कलैं, टबजाके साँवाब्याज सहितके रकम कोषमे जम्मा हुइ कलेसे कृषि समूहमे लगानी कर्टी जाब । विपन्न गरिब, दलित, एकल महिला, आदिवासी जनजाति लगायत आर्थिक विपन्नता हुइल मनैंनहे, अन्य उपभोक्ता सदस्य सरह समान सहभागितामे विकास करैना घुम्तीकोषके पहिल हकदारके रुपमे लेना कैगैल बा ।
घुम्तीकोषके सुरुवात रकम टोल समितिमार्फत १० लाख सम्बन्धित टोल समिति ओ समिति सिफारिस करल कृषि समूहके बैंक खातामे जम्मा कर्ना व्यवस्था करल सामुदायिक वनके कार्यालय सचिव हरिकृष्ण चौधरी बटैलैं ।
एकल उपभोक्ता सदस्यके हकमे २० हजारसे ३५ हजार, समूह जमानीमे पाँचसे सातजहनके समूहहे एक लाखसे ओ एक लाख ५० हजारसम ऋण डेटी आइल अध्यक्ष राजवंशीके कहाइ बा । हुँकार अन्सार अब्बेसम तीनठो समूहहे घुम्ती कोषमार्फत २३ लाख १० हजार लगानी कैल बा ।
बीउ पूँजीके रुपमे तीनठो टोल समितिहे १० लाखका दरसे ३० लाख रकम अनुदानके रुपमे डेगैल बा । टोल समिति घुम्तीकोष परिचालन कार्यविधि अन्सार समूहमे आवद्ध सदस्यनसे सम्झौता कैके ऋण लगानी हुइल बा ।
घुम्ती कोषके रकम उन्नत जातके पशुपालन, व्यावसायिक खेटी, व्यावसायिक हस्तकला ओ व्यवसाय व्यापारमे लगानी कैना व्यवस्था कैल बा । महाकाली सामुदायिक वनमे एक हजार ९४ उपभोक्ता बटैं छन् । उ सामुदायिक वनके क्षेत्रफल १७९.५७ हेक्टरमे फैलल बा ।
