सशस्त्र द्वन्द्वकाल ओराइल, पीडितके घाउ ओस्टे
पहुरा समाचारदाता
धनगढी, ११ फागुन । सशस्त्र द्वन्द्वकाल सेकल १८ बर्ष पुग्लेसेफे द्वन्द्वपीडितहुकनके घाउ भर अभिन पुरे नइसेकल सरोकारवाला निकायके प्रतिनिधिहुक्रे बटैले बटै ।
द्वन्द्वपीडितहुकनके अधिकारके क्षेत्रमे काम कैना संस्था एफडब्लुएलडी, टीजे नेटवर्क ओ टीपिओ नेपालसे इन्टरनेशनल एलर्टके सहयोगमे मंगरके रोज घनगढीमे आयोजना करल ‘द्वन्दपीडितहुकनके सवालमे समुदायके अनुभव’ सम्बन्धी छलफल कार्यक्रममे द्वन्दपीडितहुकनके अधिकारके क्षेत्रमे काम करुइा अगुवाहुक्रे ओसिन बटैले ।
टीपिओ नेपालके मनोसामाजिक विमर्शकर्ता कमला ओली सशस्त्र द्वन्द सेकल करिब दुई दशक पुगे लग्लेसेफे द्वन्द्वपीडितहुक्रे अभिनफे मानसिक ओ शारीरिक समस्याके उपचार कैना बाध्य रहल बटैली । टीपिओ नेपालसे सशस्त्र द्वन्द्वकालके ८० जनहनहे काउन्सिलिन तथा उपचार कराइल मनोसामाजिक विमर्शकर्ता ओली बटैली ।
राज्यसे द्वन्द्वपीडितके समस्या नइबुझेबेर ओइनके मनोवल कम्जोर हुइटी गैल बा,’ उहाँ कहली, ‘कतिपयसे आत्महत्या समेट कैना प्रयास करल उदाहरण बा । ओइनहे सामाजिक मनोविमर्श डेहलपाछे अब्बे अवस्था सुधार हुइटी गैल बा । कैलालीमे अभिनफे २१ जाने मानसिक उपचारके औषधी खैटी रहल बटै ।’
राज्यपक्षसे १६ प्रकारके मानसिक रोग सम्बन्धी निःशुल्क उपचार तथा औषधी वितरण कैना कहले बा । सशस्त्र द्वन्द्वपीडितसे सरकारी डाक्टर सेवा नइपाके प्राइभेट अस्पातलमे उपचार करैना बाध्य रहलफे उहाँ बटैली । टीपिओ नेपालसे सशस्त्र द्वन्द्वपीडित १० जनहनहे १० हजारके दरसे आर्जआर्जनके लाग सहयोगफे करल उहाँ बटैली ।
एफडब्लुएलडीके जिल्ला संयोजक रेणुप्रधान श्रेष्ठ अपनेहुक्रे सशस्त्र द्वन्द्वपीडितहुकनहे स्वास्थ्य उपचार सेवा, आयआर्जनके लाग सहयोग, सामुदायिक परिपुरण, तथ्यांक संकलन, बालबालिकाहुकनहे छात्रवृतिके कार्यक्रम करटी रहल बटैली । उहाँ सशस्त्र द्वन्द्वपीडितहुकनहे तालिम सहित १० जनहनहे ५० हजारके दरसे आर्जआर्जनके लाग सहयोग करलफे बटैली ।
कैलारी गाउँपालिकाके सशस्त्र द्वन्दपीडित लक्ष्मी चौधरी एफडब्लुएलडीसे पाइल सहयोग तथा तालिमसे पारिवारिक सम्बन्धमे सुधार हुइनाके साथे आर्जआर्जनके लाग पाइल सहयोगसे व्यावसाय कैना सहजुल हुइल बटैली । उहाँ कहली, एफडब्लुएलडीसे १० परिवारके ३० जनहनहे तालिम डेहल रहे । जेम्ने परिवारके और जे फे तालिम पाके सम्बन्ध सुधार हुइनाके साथे पारिवारिक हिंसाफे कम हुइल बा ।
धनगढी उपमहानगरपालिका–२ के वडा सदस्य तथा न्यायिक समिति सदस्य रत्ना विष्ट सशस्त्र द्वन्द्वपीडित तथा एकल महिलाके लाग ३ लाख से ढेरके लगानीमे हल्डी खेती संचालन करल बटैली । वडा कार्यालयसे सेनेटरी प्याड निर्माण कैना मेसिन डेहेबेर आयआर्जनमे टेवा पुगल वडा सदस्य विष्ट बटैली ।
मानव अधिकारका लागि एकल महिलाके अध्यक्ष सुमन शर्मा सशस्त्र द्वन्द्वपीडित अभिनफे छातीभित्तर गोलि बोक्के नेंगे परल अवस्था रहल बटैली । कैलारी गाउँपालिकासे सशस्त्र द्वन्द्वपीडित तथा सहिदके सम्झनामे महत्वपूर्ण काम करलेसेफे और स्थानीयसे ओइनके परिपुरण तथा क्षतिपूर्तिके लाग काम नइकरल बटैली । कैलारी–९ ओ ६ वडामे द्वन्द्वपीडितके परिपुरण तथा सम्झनाके लाग संग्राहलयफे निर्माण हुइल उहाँ बटैली ।
कार्यक्रममे संकल्पके प्रदेश उपाध्यक्ष भगवती हमाल, धनगढी उपमहानगरपालिका–२ के सचिव भानुभक्त उपाध्याय, धनगढी उपमहानगरपालिका–१ के वडा सदस्य विमला देवल लगायत अपन बाट राखल रहिट ।
समावेशी संक्रमणकालिन न्याय, मेलमिलाप तथा द्वन्द्व समाधानका लागि जिल्ला संजाल कैलालीके संयोजक गणेश मल्ल सशस्त्र द्वन्द्वकालके बेला मुलुकके ढेर जाने पीडित हुइलेसेफे ओइनके आवाज सुनुवाई नइहुइल बटैलै । उहाँ कहलै कतिपय स्थानीय तहसे सशस्त्रकालके द्वन्द्वपीडितहुकनके परिपुरण ओ तत्कालिन आवश्यकता सम्बोधन कैना अपने ओरसे बजेट विनियोजना करले बटै । कलेसे कतिपय स्थानीय तह संघके मुख तक्ना प्रवृति डेखल बा ।
१० वर्षे सशस्त्र द्वन्दकाल विसं २०६३ साल अगहन ५ गते राज्यके ओरसे प्रधानमन्त्री गिरिजाप्रसाद कोइराला ओ नेकपा माओवादीके ओरसे अध्यक्ष पुष्पकमल दाहाल प्रचण्ड विस्तृत शान्ति सम्झौतामे हस्ताक्षर करले रहिट ।
