कोभिड–१९ से शिक्षामे परल प्रभाव

कोभिड–१९ पहिले चीनके वुहान प्रान्त १९ डिसेम्बरमे आइल रहे । कोभिड–१९ के नामाकरण २०२० जनवरी ३० मे घोषणा करल रहे । कोभिड–१९ के नेपालमे पहिल संक्रमित २०७६ माघ ९ गते देखा परल रहे । ओस्टेक, कोभिड–१९ हे विश्वव्यापी महामारीके रूपमे २०२० फ्रेब्रुअरी ११ मे घोषणा करल रहे । नेपालमे कोरोना भाइरस संक्रमणसे २०७७ जेठ ३ गते पहिल व्यक्तिके मृत्यु हुइल रहे । विश्वमे ढेर संक्रमित रहल देशमे अमेरिका, भारत, ब्राजिल, फ्रान्स, बेलायत हो । कोभिड–१९ के पूरा रुप कोरोना भाइरस डिजिज हो ।

शिक्षा मनैन्के लाग अति महत्वपूर्ण ओ अपरिहार्य चिज हो । शिक्षासे मनैन्के व्यक्तित्व विकास कैके आत्मनिर्भर हुइ सेक्ठैं । कोरोना भाइरस शिक्षा क्षेत्रमे बरवार प्रभाव परले बा । यिहिनसे मनैन्मे मानसिक चिन्ता पैदा होके भविष्य अन्धकार हुइल अनुभूति करले बटैं । यहाँ किल नैहोके दुर्गम वा सुगमे ठाउँमे इन्टरनेट ओ अनलाइन कक्षाके पहुँचसे बाहेर रहल विद्यार्थीहकनके टे यी और गम्भीर अवस्था सिर्जना करले बा । कोभिड–१९ से हम्रे घरे बैठे परल । यकर साथे शारीरिक क्रियाकलापके कमिले स्वास्थ्य अवस्थामे नकारात्मक प्रभाव परल डेखाइठ । अनलाइन कक्षा पह्रेबेर मजासे नैबुझ्न, प्रभावकारी मूल्यांनक नैहुइनालगायतके समस्या डेखा परल । विद्यार्थीहुक्रे घरे टिभी हेरना, मोबाइल चलैना, डाइबाबाहे सटैना जैसिन समस्या फेन डेखा परल । सबसे ढेर टे अनलाइन ग्याम फ्रिफायर, पप्जी, सोसल मिडिया टिकटक, फेसबुकमे लागके विद्यार्थी बिग्रल बटैं । शैक्षिक संस्था बन्द होके विद्यार्थीहुकनहे घरे बैठेपरना अवस्था सिर्जना हुइल । यिहे कारण विद्यार्थीनमे शारीरिक तथा मानसिक असर परल । मने, औरेओर विद्यार्थीहुक्रे घरे रहल बेला नयाँ नयाँ चिज फेन सिखे पैलैं । विद्यार्थीहुक्रे डाइबाबनसँग रहिके मनोरञ्जल करना अवसर पैलैं । मजासे बोले, लिखे, पह्रे फेन सिख्लैं ।

यी सक्कु समस्या ओ कुछ नयाँ मजा बाट विद्यार्थीहुक्रे कोभिड–१९ के कारण भोग्लैं । अइसिन समस्या हटाइक लाग राष्ट्रियस्तरसे पहल करेपरठ । हम्रे फेन अपन टरफसे यम्ने सकारात्मक भूमिका निर्वाह खेले परठ । अइसिन अवस्थामे सक्कु क्षेत्रमे विद्यार्थीहुकनहे इनटरनेट माध्यमसे अनलाइन कक्षाके व्यवस्था मिलाइ परठ । ओस्टेक, सहि तरिकासे मास्कके प्रयोग, सेनिटाइजरके प्रयोग करपरठ । कम्तीमे फेन दुई मिटरके दुरीमे रना, साबुन पानीले मिसमिस हात धोइपरठ, पानी ढढेर पिनाके साथे अन्य सरसफाईके उपाय अपनाइक परठ ।

(यी निबन्ध ११२ औं अन्तर्राष्ट्रिय नारी दिवसके अवसरमे बालकन्याण संघ टीकापुर–८, वल्र्डभिजन इन्टरनेशनल नेपालके साझेदारीमे सञ्चालित बाल स्पोन्सरसिप कार्यक्रम अन्तर्गत गौरीगंगा नगरपालिकामे पालिकास्तरीय निबन्ध लेखन प्रतियोगितामे पहिल स्थान प्राप्त निबन्ध हो ।)