२ रुप्या लगानी सौ रुप्या आम्दानी
सागर कुश्मी
धनगढी २८, चैत । कैलाली जिल्लक् कैलारी गाउँपालिका वडा नम्बर ४ नवलपुरके निर्मल चौधरी एक शिक्षित ठँरिया हुइँट् । उहाँ कैलाली बहुमुखी क्याम्पसमे बीए, बीएसडब्लु विषयमे अध्ययनरत बटैं ।
अध्ययन करल सर्टिफिकेट बोक्के टमान संघसंस्था, कार्यालय फेन पुग्नै । काम फेन भेटैलैं । मने हुँकार उ डाम से जिनगी गुजारा चलैना महाँ साँसट हुइलिन । योग्यता अन्सार डाम नैपाके निर्मल अपनही कुछ कर्ना सोंच अइलिन । ओहेमारे उहाँ अपन ठन रहल सीप बेलसके अपनही स्वरोजगार हुइनामे गेंह लगैनु उहाँ बटैलैं ।
औरेक काम करल से टे अपन डोकान खोलके अपनही कुछ करुँ कहिके एहोर भुट्ला कट्ना काममे लग्नु उहाँ कलैं, पर्हाइ करक योग्यता अन्सार कामडाम नैपाके मै इ पेशामे लागल उहाँ बटैलैं ।
उहाँ अझ्कल ३ बरससे धनगढीके बुद्ध चोकमे एनके हेयर कटिंग सञ्चालन करटी आइल बटैँ । २३ बरसके निर्मल चौधरी भुट्ला कट्ना सिप सिख्के आत्म निर्भर हुइल बटैँ । उहाँ अब्बे दैनिक एक हजार से लेके तीन हजार सम अम्दानी करटी आइल बटैँ । यिहे अम्दानी उहाँ अपन घर खर्च, अपन पर्हाइ खर्च, बिरुवा खर्च सबकुछ व्यहोर्टी आइल बटैँ ।
उहाँ कठैँ, मै छोटे से यि सिप सिख्के आपन काम गुजारा चलैटी आइल बटुँ । पर्हेबेर इ सीप सिख रख्ले रहुँ उहाँ कलैं, यदि समयमे यि काम नै सिख्टु कलेसे महिनफें पन काम चलैना बहुट कठिन रहे । मोर संग्गेक लर्का समयमे सिप नै सिख्के अब्बे भारत ओर मजदुरी करटी आइल बटैँ उहाँ बटैलैं ।
इ भुट्ला कट्ना पेशा अइसिन पेशा हो जौनकी छोट लगानीसे सुरु कैके छोटे समयमे ढेर आम्दानी लेहे सेक्जाइठ । उहाँ फेन कठैँ, हम्रे थारु युवा ना ढेर पर्हे सेक्ठी, ना टे सिप सिख्के काम करे सेक्ठी, इहे कारणसे हम्रे प्रगति फें करे नैसेक्ठी । उहाँ कठैं इ नौवाँ पेशा २ रुपिया लगानीमे सौ रुपिया कमाइ सेक्जाइठ, ओहेमारे नोकरी करल से टे इहे काम मन परल ओ डरगरके लागल बटुँ, उहाँ कहलैं ।
जिनगीमे सफलता पाइक लाग अपन दिलसे मेहनत करलेसे हर कानमे सफलता पाइ सेक्जाइठ । एकर एक्ठो उधाहरण हुँइट् निर्मल चौधरी । उहाँ इहे पेशासे अपन डाइ बाबा, बहिनियाँ एक सुखीसे परिवार परिवार गुजारा चलैटि आइल बटैँ ।
निर्मल चौधरी जैसिन अब्बेक जवान ठँरियन सिप ओ जाँगर लगैलेसे अपने गाउँघरमे फें स्वरोजगार बने सेक्जाइठ । छोट व्यवसायसे कैके फेन अपन भारी व्यवसाय बह्राइ सेक्जाइठ । जे दुखसे लरठ ओहे जिनगीमे पार हुइ सेकठ ।
इहे सीप सिख्के हुँकारे डोकानमे अब्बे डु जाने ठँरियन फें ओहैं काम कर्टी बटैं । बैठल से टे इहे काम ठिक लागल । इहे कामसे सन्तुष्ट होके परिवारमे गुजारा मजेमजे चल्टी रहल फुलवारीके अशोक चौधरी बटैलैं ।
ओस्टके, भजनी ५ लालबोझी ४० बरसके डोंगलु चौधरी फेन अब्बे क्याम्पसरोड धनगढीमे कान्छी हेयर कटिंग संचालन कैके मजा आम्दानी कर्टी आइल बटैं । उहाँ इहे काममे अपन डोकानमे १ जहनहे रोजगार डेले बटैं । डोंगलु चौधरी फेन १ हजार से २ हजार सम कमैटी आइल बटैं ।
बुद्ध चोक धनगढीमे रहल जुम हेयर कटिंगके अर्जुन चौधरी फेन इहे काम करट १६ बरससे ढेर होसेक्लिन । इहे काम कैके अर्जुन चौधरी फें धनगढी गाउँमे १० ढुर जग्ग्गा खरिदके पक्की घर समेत बना सेक्ले बटैं । अब्बे हुँकार डोकानमे फें ३ जाने जवान ठँरियन रोजगार पाइल उहाँ बटैलैं ।
उहाँ कठैँ, सबसे मजा ओ कम आम्दानीसे ढेर नाफा कमाइ सेक्ना कलक जवान लर्कनके लाग भुट्ला कट्ना काम सब्से अच्छा हो उहाँ कठैं । अइना दिनमे फें सीप सिख्के इहे काममे लग्ना सल्लाह डेठैं अर्जुन चौधरी ।
आप हम्रे थारु युवा फेन निर्मल, डोंगलु, अर्जुन जस्टे सीप सिख्खा कैके अपन भविष्य ओजरार कैनामे ढिल जिन करी । उहाँक जस्टे मिहनेत कैके पस्ना चुहाइ अपन गाउँ ठाउँमे । विदेश जैही नैपरी ।
