कौन तन्त्रमे हमार पुनर्स्थापना हुइः मुक्त कमैया
पहुरा समाचारदाता
धनगढी, ३ सावन । सुदूरपश्चिम प्रदेशके मुख्यमन्त्री त्रिलोचन भट्ट मुक्त कमैया पुनर्स्थापनाके लाग प्रदेश सरकार नीति बनाके आघे बह्रना बटैले बटैं ।
२२ औं कमैया मुक्ति दिवसके अवसरमे सोम्मारके रोज धनगढीमे मुक्त कमैया क्षेत्रमे कार्यरत टमान संघसंस्थासे करल कार्यक्रमके उद्घाटन करटि मुख्यमन्त्री भट्ट मुक्त कमैया, कम्लहरी, हलियालगायतके पुनर्स्थापना करनामे कुछ कानूनी समस्या रहल ओरसे अभिनसम पुनर्स्थापना हुइ नैसेकल बटैलैं । उहाँ कलैं, “प्रदेश सरकार एकीकृत आवासके कार्यक्रम बनैले बा, मने भूमिके व्यवस्था हुइ नैसेकठो ।” “आवासके लाग प्रदेश सरकारके अधिकारक्षेत्र भित्र बा, मने भूमिके व्यवस्था प्रदेश सरकार करे नैसेकठो,” उहाँ कलैं, “भूमि व्यवस्थापनके अधिकार संघ सरकारके ठन किल बटिस ।” उहाँ बलैं, “आब प्रदेश सरकार भूमि व्यवस्थापनके नीति नान्के मुक्त कमैया तथा हलियाहुकनके पुनर्स्थापना करना प्रयत्नमे बा ।”
ओस्टेके, कार्यक्रममे उहाँ मुक्त कमैयाहुकनके आवश्यकता अनुसार तालिम, अनुदान, सहयोगके लाग साझा धारणा लेके प्रदेश सरकार समक्ष अइना आग्रह करलैं । उहाँ प्रदेश सरकारके आर्थिक रूपसे विपन्न, उच्च शिक्षा हासिल करे नैसेक्ना, स्वास्थ्योपचार करे नैसेक्ना वर्गके लाग प्रदेश सरकारमे टमान कार्यक्रम रहल बटैलैं । उहाँ मुक्त कमैयाहुकनके समस्याके सम्बोधन करना प्रदेश सरकार प्रतिवद्ध रहल फेन बटैलैं ।
कार्यक्रममे भूमि व्यवस्था, कृषि तथा सहकारीमन्त्री बिनितादेवी चौधरी मुक्त कमैयाहुक्रे जहाँ बैठल बटैं वहैंक जग्गाके लालपुर्जा डेना आश्वासन डेलि । उहाँ कलि, “प्रदेश सरकारके कुछ कानूनी बाध्यताके कारण मुक्त कमैयनके पुनर्स्थापना हुइ नैसेकल ।” “आव मुक्त कमैयनके पुनस्र्थापनाके लाग प्रदेश सरकार नीति नान्के भूमि ओ आवासके व्यवस्था करि,” उहाँ कलि, “मुक्त कमैयाके पुनर्स्थापनाके लाग प्रदेश सरकार विशेष प्राथमिकता ओ गम्भीर होके लागल बा । आब समस्याके निकास निक्री ।” ओस्टेके उहाँ, मुक्त कमैयाहुकनहे आयआर्जनके काममे फेन लग्न आग्रह करलि । यहाँ मुक्त कमैयनके आयआर्जनके लाग भूमि व्यवस्था, कृषि तथा सहकारी मन्त्रालयमे टमान कार्यक्रम रहल जानकारी करैलि । मन्त्रालयमे समूह बनाके अइलेसे ५० प्रतिशतसे लेके शतप्रतिशत अनुदानके कार्यक्रम रहल फेन उहाँ जानकारी करैले रहि ।
कार्यक्रममे मुख्य न्यायाधिवक्ता कुलानन्द उपाध्याय मुक्त कमैयाहुकनके समस्या समाधानके लाग संघ, प्रदेश ओ स्थानीय सरकार समन्वय करेपरन आवश्यक रहल बटैलैं । उहाँ दास प्रथाके अवशेष मुक्त कमैया प्रथाके व्यवस्थापनके लाग सरोकारवालाहुक्रे लागे परना बटैलैं ।
मुक्त कमैया आन्दोलन परिचालन संयन्त्रके यज्ञराज चौधरी कमैया पुनर्स्थापनाके प्रतिवद्धता करलेसे फेन अभिनसम कार्यान्वयन नैकरल बटैलैं । उहाँ कलैं, “सरकार चहलेसे मुक्त कमैया पुनर्स्थापना करना समय नैलागि ।” “मुक्त कमैया ओ अन्य सुकुम्वासी, हलियाहुकनके पुनर्स्थापना फरक ढंगसे हुइपरल,” उहाँ कलैं, “मुक्त कमैयामे मुद्दा फरक हो ।”
ओस्टेके, कार्यक्रममे मुक्तकमैया अगुवा दीपु चौधरी मुक्त कमैयाहुकनके पुनर्स्थापना कौन तन्त्रमे हुइ कना प्रश्न करले बटैं । उहाँ कलैं, “कमैया मुक्ति राजतन्त्रके पालामे हुइल । राजतन्त्र गैल, प्रजातन्त्र आइल ओकरबाद लोकतान्त्रिक गणतन्त्र फेन आइल अभिन हमार पुनर्स्थापना नैहुइल, काहे ?” उहाँ सरकारसे मुक्त कमैयाके न्यायोचित पुनर्स्थापना यिहे मंसिर आघे हुइना अपेक्ष रहल बटैलैं ।
यिहिनसे आघे २२ औं कमैया मुक्ति दिवसके अवसरमे धनगढीमे वृहत र्याली आयोजना करल रहे ।
कैलाली जिल्लामे अभिन ९ सय ५३ मुक्त कमैयाके पुनर्स्थापना हुइना बाँकी बा । ओम्नेसे ४ सय सट्टा भर्ना करेपरना, १ सय ७३ परिचयपत्र बदर करल ओ ३ सय ८० शुद्ध जग्गा नैपाइल रहल बटैं ।
मुक्त कमैया महिला विकास मञ्च, मुक्त कमैया समाज, कमैया प्रथा उन्मुलन समाज, कमैया महिला जागरण समाज नेपाल, दीगो विकास, एलडब्ल्युएफ नेपालके संयुक्त आयोजनामे हुइल कार्यक्रम कमैया प्रथा उन्मुलन समाजके अध्यक्ष सीताराम चौधरीके अध्यक्षतामे हुइल रहे ।
कमैया महिला जागरण समाज नेपालके अध्यक्ष मीना कठरिया स्वागत करल कार्यक्रमके सञ्चालन मुक्त कमैया महिला विकास मञ्चके कार्यक्रम संयोजक ईन्द्र चौधरी करले रहैं । कार्यक्रममे राष्ट्रिय मानव अधिकार आयोग प्रदेश प्रमुख मोहनदेव जोशी, मुक्त कमैया महिला विकास मञ्चके अध्यक्ष कौशिला चौधरीलगायत टमान मुक्त कमैया शिविरके मुक्त कमैयाहुकनके सहभागिता रहे ।
मुक्त कमैया दिवसके अवसरमे कैलालीके जानकी गाउँपालिका, भजनी नगरपालिका, टीकापुर नगरपालिका सार्वजनिक बिदा डेले रहे । मुक्त कमैया दिवस धनगढी, टीकापुर, लम्की, भजनी नगरपालिकालगायत पालिकामे भव्यताके साथ मनाइल बा ।
