मुक्त कमलरीसे १० बुँदे सम्झौता कार्यान्वयनके माग
पहुरा समाचारदाता
काठमाडौं, ३० सावन । मुक्त कमलरीहुक्रे सरकारसंग हुइल १० बुँदे सम्झौता कार्यान्वयन कैना माग करले बटै ।
सोम्मार रोज रिपोर्टर्स क्लब नेपालमे पत्रकार सम्मेलन कैके नेपालके पश्चिमी जिल्ला दाङ, बाँके, बर्दिया, कैलाली ओ कञ्चनपुरमे रहल मुक्त कमलरीहुक्रे २०७० जेठ २४ गते हुइल सरकारसंग हुइल १० बुँदे सम्झौता कार्यान्वयन कैना माग करल हुइट ।
निरन्तर दवावपाछे सरकारसे कमलरी प्रथाहे अवैध घोषणा करटी १३ असार २०७० मे कमलरी मुक्त घोषणा करल रहे । कमलरी प्रथाहे अवैध घोषणा करलसंगे २०७० जेठ २४ गते कमलरी प्रथा उन्मूलनके लाग संयुक्त संघर्ष समिति ओ सरकारवीच मुक्त कमलरीके हकहितके साथे विद्यमान कमलरी छात्रवृत्तिके रकम बृद्धि ओ शिक्षा निर्देशिका संशोधन कैना विषयमे सहमति हुइल रहे ।
पत्रकार सम्मेलनमे बोल्टी मुक्त कमलरी आशा चौधरी नेपाल सरकार ओ मुक्त कमलरी बिच हुइल १० बुँदे सम्झौताके तत्काल कार्यान्वयन कैना माग करल हुइट । सरकारसे सक्कु मुक्त कमलरीहुकनहे तत्काल परिचयपत्रके व्यवस्थाके लाग पहल करे पर्ना उहाँक कहाई रहे । मुक्त कमलरीके लाग प्रदान करटी आइल छात्रवृति स्नातककोत्तर तहसम व्यवस्था करके समयानुकूल वृद्धि कैनाफे उहाँ आग्रह करली । आशा कहली, ‘२०७८ असार मसान्त पश्चात खैना बैठनाके स्पष्ट प्रवन्ध नइहुके उहाँ अध्ययन करटी रहल १० जाने मुक्त कमलरी छात्रा घर न घाटके हुइना अवस्था डेखल बा । यकर उचित सम्बोधन नइहुइना हो कलेसे मुक्त कमलरी फेरसे कमलरी बैठे जाई पर्ना बाध्यात्मक परिस्थितिके सृजना हुइना निश्चितप्राय बा ।’
मुक्त कमलरी महिमा चौधरी घरबास नइरहल मुक्त कमलरीहे स्नातकोत्तर तहसम छात्रावासमे बैठे पैना व्यवस्था करे पर्ना बटैली । यकर लाग उहाँ दाङ, कैलाली ओ कन्चनपुरमे रहल छात्रावासमे रहल १६६ जानेक तत्काल आवासिय सुविधाके व्यवस्थापन कैना सरकारसमक्ष आग्रह करली । मुक्त कमलरीके लाग रोजगारीके सुनिश्चितता करे पर्नामे उहाँ जोड डेली ।
महिमा कहली, ‘स्थानीय तह मार्फत मुक्त कमलरीके निःशुल्क शिक्षाके व्यवस्था मिलाजाए ।’ उहाँ मुक्त कमलरीसे सञ्चालन करटी आइल सहकारीके लाग प्रदेश तथा स्थानीय तह जग्गा ओ भवनके व्यवस्था मिलैना पहल कैनाफे सरकारसंग आग्रह करली ।
मुक्त कमलरी निर्मला चौधरी मुक्त कमलरीहुकनहे शिक्षा, सिप, रोजगार ओ जमिनसहितके पुनस्र्थापनाके लाग मुक्त कमलरी पुनस्र्थापना आयोग गठन करे पर्ना बटैली । उहाँ कहली, ‘सरकारसे आयोग गठन करके तत्काल मुक्त कमलरीहुकनके पूनस्र्थापना करजाए ।’ उहाँ मुक्त कमलरीके क्षमता विकास, सिप विकास ओ रोजगारके लाग बजेट विनियोजन करके कार्यान्वयन करे पर्ना समेत बटैली । सरकारसे घरबास नइहुइल मुक्त कमलरीहे जग्गा ओ आवासके व्यवस्था करे पर्ना उहाँ माग रख्ली । उहाँ मुतm कमलरीहुनके पुनस्र्थापना लक्षित वजेट तथा कार्यक्रम लागु करे पर्नामे जोड डेली ।
मुक्त कमलरी मन्जिता चौधरी मुक्त कमलरीके हत्या, वेपत्ता ओ यौनहिंसा जैसिन घटना हुइटी रहल कहटी ओम्ने अनुसन्धान करके दोषीहे कारर्वाही करे पर्ना बटैली । उहाँ पीडितहे न्याय डेना सरकारसे पहल करे पर्नामे जोड डेली ।
मन्जिता स्थानीय सरकार तथा प्रदेश सरकारसे मुतm कमलरीहुकनहे रोजगारीमे विशेष प्राथमिकता डेहे पर्ना माग करली । उहाँ कहली, ‘अभिनफे कुछ स्थानमे कमलरी रख्न परम्परा चल्टी आइल सुन्टी आइल बटी, यी बारेमे प्रदेश तथा स्थानीय सरकारसे अनुगमन करके कानूनी दायरामे नानके कारवाही करे परठ ।’
