रेशमलगायत राजबन्दीहुकन रिहाके माग

पहुरा समाचारदाता
टीकापुर, ७ भदौ । सुशासन, समृद्धि ओ सद्भावके लाग टीकापुर घटनाहे राजनीतिक घटना रहल निर्णय कैके सांसद् रेशम चौधरीलगायत सक्कु राजबन्दीहे रिहा करेपरना माग करल बा ।

२०७२ भदौ ७ गते टीकापुरमे घटना हुइल दिनहे विद्रोह दिवसके रुपमे मनैना आयोजित समारोहके वक्ताहुक्रे राजनीतिक दल घटनाहे राजनीतिक घटना कलेसे फेन निर्णय करे नैसेकल ओरसे उ माग करल हो ।

उहाँहुक्रे थारु समुदाय राजनीतिक माग ढरल आन्दोलनमे हुइल घटनाहे लेके आन्दोलनमे संलग्न निर्दोष व्यक्तिहे जेल सजाय करल प्रति विरोध जनैले बटैं । २०७४ के प्रतिनिधि सभा सदस्य निर्वाचनमे रेशम चौधरी विजयी हुइलेसे फेन पाँच वर्षसे कैलालीके निर्वाचन क्षेत्र नम्ब १ संघीय जनप्रतिनिधिबिहिन रहल बा ।

थरुहट÷थारुवान राष्ट्रिय मोर्चा तथा थारु कल्याणकारिणी सभालगायतसे आयोजना करल कार्यक्रमहे सम्बोधन करटि टीकापुर नगरपालिकाके मेयर एवं नागरिक उन्मुक्तिके नेता रामलाल डंगौरा थारु कलैं, “विकास, समृद्धि ओ सद्भावके लाग तत्काल टीकापुर घटनाके अभियोगमे थुनल बन्दीहुकनहे तत्काल रिहा करेपरल । उहाँहुकनके रिहाइपाछे टीकापुरमे कबु फेन सद्भाव नैबिग्रि ।”

आसन्न निर्वाचन आघे जेलबन्दीहुकनहे रिहा कैके सामाजिक सद्भावके वातावरण राज्यसे सिर्जना करेपरना समेत मेयर थारुके माग रहे ।

कैलालीके सक्कु स्थानीय तह टीकापुर घटनाहे राजनीतिक घटना रहल निर्णय कैके उ घटनाके अभियोग लागल व्यक्तिहुकनके रिहाइ करना पहल करेपरना लम्कीचुहा नगरपालिकाके मेयर सुशीला शाही बटैलि ।

थारु कल्याणकारिणी सभाके केन्द्र्रीय सदस्य रामचरण चौधरी टीकापुर घटनाके निकासके लाग टीकापुर घटना छानबिनके लाग तयार पारल गिरिशचन्द्र लाल आयोगके प्रतिवेदन सार्वजनिक करेपरना बटैलैं । सरकारसे प्रतिवेदन सार्वजनिक करना ढिलाइ कैके थारुलगायत उत्पीडित समुदायउप्पर अन्याय हुइल उहाँक कहाइ रहे ।

ओस्टेके, नागरिक उन्मुक्ति पार्टीसे आयोजित कार्यक्रममे भजनी नगरपालिकाके मेयर केवल चौधरी अधिकार प्राप्तीके राजनीतिक आन्दोलनमे राज्यसे दमन करल ओरसे टीकापुर घटना घटल बटैलैं । उहाँ यहाँक विकासके लाग राज्यसे टीकापुर घटना सम्बोधन करना ढिलाइ करे नैहुइना उल्लेख करलैं ।

थरुहट नेता लक्ष्मण थारु हालसम राजनीतिक आन्दोलनहे आपराधिक आन्दोलनके रुपमे लेहल बटैटि आब हुइना चुनावहे आन्दोलनके रुपमे लैजैना आह्वान करलैं । टीकापुर विद्रोहके जगमे नागरिक उन्मुक्ति पार्टीके जन्म हुइल बटैटि नेता थारु कलैं, “सरकारसे हालसम हमार मुद्दाप्रति सकारात्मक नैहो । मने आमजनताके एक माग बा, टीकापुर घटना राजनीतिक हो, राजनीतिक ढंगसे सम्बोधन करनाके विकल्प नैहो ।”

उहाँ कलैं, “जनता अपन मतमार्फत सरकारहे सन्देश डेटि आइल बटैं । जेकर परिणाम हो, नागरिक उन्मुक्ति पार्टी स्थानीय तह निर्वाचनमे कैलालीके चार पालिकाकामे जीत हासिल करल । टबेमारे अइना चुनावहे आन्दोलनके रुपमे लेहेपरल । सबसे सहजिल आन्दोलन निर्वाचन हो ।”

ओस्टेके कार्यक्रममे सुदूरपश्चिम प्रदेशके आन्तरिक मामिला तथा कानुन मन्त्री रणबहादुर रावल टीकापुर घटनाके क्षतिपूर्तिके रुपमे आगामी निर्वाचनमे टीकापुर क्षेत्रमे सक्कु राजनीतिक दल थारु उम्मेद्वार डेहेपरना बटैलैं । उहाँ संविधानसे डेहल अधिकार कार्यान्वयन करटि सक्कु क्षेत्रमे समानुपातिक सहभागिता सुनिश्चित करेपना बटैलैं ।
संविधान लेखनके क्रममे २०७२ भदौ ७ गते टीकापुरमे थरुहट आन्दोलनकारी ओ प्रहरीबीच दोहोरो झडप होके ८ प्रहरीसहित १ नाबालकके ज्यान गैल रहे ।

घटना हुइल डोसर दिन भदौ ८ गते बिहान कफ्र्यु जारी रहल समयमे ८० ढेर थारु समुदायके घर, पसल, एफएमलगायतमे आगजनी हुइल रहे । उ घटनाके मुद्दामे सांसद रेशम चौधरीसहित नेता कार्यकर्ता जेल सजाय भोटि आइल बटैं ।