रकम कम आके सेवाग्राही नैपैलै पूरा रकम
पहुरा समाचारदाता
भजनी, २६ भदौ । कैलालीके भजनी नगरपालिकामे सामाजिक सुरक्षा भत्ताके रकम कम आइलपाछे सेवाग्राहीहुक्रे पाइ पर्ना पूरा रकम नैपाइल खुलासा हुइल बा ।
आर्थिक बरस २०७८/०७९ के अन्तिम चौमासिकमे सामाजिक सुरक्षा भत्ता पैना नागरिकहुक्रनके लाग सरकारसे अइना रकम कम आइल कारण सेवाग्राहीहुक्रे पाइ पर्र्ना रकममे कटौती हुइल पाइल हो ।
आर्थिक बरसके टिसरा चौमासिकसम मागअनुसारके रकम अइलेसे फेन अन्तिम चौमासिकमे रकम कम आइल कारण सेवाग्राहीहुक्रनके बैंक खातामे कम रकम गैल उक्त नगरपालिका जनैले बा । उक्त भत्ता पउइया सेवाग्राहीहुक्रनके लाग रु पाँच करोड ६७ लाख आइ पर्ना रहे मने झण्डै ५२ लाख ४३ हजार आठ सय ७७ रुपैयाँ अपुग अर्थात पाँच करोड १४ लाख रुपैयाँ किल नगरपालिकामे आइल सामाजिक सुरक्षा तथा पञ्जिकरण शाखाके प्रमुख खेमराज बिनाडी बटैलै ।
“हमार माग करल रकमअनुसारके भुक्तानी नैहोके सेवाग्राहीहुक्रे कम रकम पैले बाटै । ओकर लाग नगरपालिकासे हमार कैना सक्कु प्रक्रिया पूरा करसेकल बाटी,” उहाँ कहलै, “संघीय सरकारसे कम रकम निकासा हुइल कारण सेवाग्राहीहुक्रनके खातामे कम रकम गैल बुझल बा । अपुग अर्थात् कम परल रकम आब अइना सामाजिक सुरक्षा भत्तामे बह्रके अइना हो ।”
शाखाप्रमुख बिनाडी भत्ताके रकममे स्थानीय ओ प्रदेश सरकारके कौनो फेन भूमिका नैरहना मने ओकर सम्बन्ध संघीय सरकार ओ कोलोनिकामे रहना हुइल ओरसे स्थानीय सरकारसे रकम खाइल कना बात निराधार रहल बटैलै ।
सेवाग्राहीसे फारम दर्ता करल आधारमे फेन सक्कु जाने पैना रकम बराबर नाइ अइना उल्लेख कैटी उहाँ कहलै, “चैतमे दर्ता करल हो कलेसे ओकर वैशाखसे भत्ता अइना सुरु हुइठ् कलेसे वैशाखमे दर्ता करल जेठसे सुरु हुइठ् । सेवाग्राहीहुक्रे केक्रो ढिउर पैसा आइल आपन कम आइल कहिके शंका फेन कैना करल बाटै । उ हमार कारणसे हुइल नैहो ।”
नगर प्रमुख केवल चौधरी अब्बे जनप्रतिनिधि ओ कर्मचारी मिलके सामाजिक सुरक्षा भत्ताके पैसा खाइल कहटी आपनउपर आरोप लगाइल ओ उ आरोप निराधार रहल बटैलै । “अब्बे कुछ समूहसे जनप्रतिनिधि सामाजिक सुरक्षा भत्ता खाइल अपुष्ट खबर नागरिकमे फैलाके राजनीतिक दुनो सोझ्याइना काम कैटी रहल बाटै,” उहाँ कहलै ,“मने सामाजिक सुरक्षा भत्ताके रकम कैसिक रहठ् कनासम हम्रहीन्हे पता नैहो ।”
