भलमन्सा प्रथाहे कानुनी मान्यता डेना माग

पहुरा समाचारदाता
सुखड, २७ भदौ । थारु समुदायके परम्परागत भलमन्सा प्रथाहे कानुनी मान्यता डेना नगरपालिका स्तरीय भलमन्सा कार्यसमितिसे घोडाघोडी नगरपालिकाहे १३ बुँदे ज्ञापनपत्र बुझाइल बा ।

उ माग सहितके ज्ञापनपत्र नगर प्रमुख खडक बहादुर रावतहे नगरपालिका स्तरीय भलमन्सा कार्यसमितिसे बुझाइल हो । स्थानीय तहके चुनावके बेला भलमन्सा प्रथाहे कानुनी मान्यता डेना प्रतिबद्धता आपनठन जाहेर कैलेसे फेन एक सय दिन बित्लेसे फेन प्रतिबद्धता पुरा नैहुइल कहटी ज्ञापन पत्र बुझाइल जनाइल बा ।

ज्ञापन पत्रमे भलमन्सा÷बरघरनके कार्यविधि बनाके सूचीकृत कैके कानुनी मान्यता डेहे पर्र्ना, भलमन्साहुक्रनसे मिलाइल टमान विवादहहे न्यायिक निरूपण करल निर्यणहे दस्ताबेजिकरण करे पर्र्ना, नगर स्तरीय थारु आयोग गठन कैके कार्यविधि लाने पर्ना रहल बा ।

ओस्टके थारु देउथान(मरुवा)हे उहे गाउँके नाउँमे सर्व निहित हुइना मेरके कानुनी व्यवस्था करे पर्ना ओ उ देउथान(मरुवा) के भागचन कैटी आइल जमिन उहे मरुवाके नाउँमे दर्ता श्रेस्ता कायम हुइ पर्र्ना, थारु समुदायके गरिब तथा जेहेन्दार विद्यार्थीनके लाग प्राबिधिक शिक्षामे निःशुल्क आरक्षण कोटाके व्यवस्था करे पर्ना लगायत रहल बा ।

ज्ञापन पत्र बुझ्टी नगर प्रमुख रावत चुनावके बेला करल प्रतिबद्धता नैभुलल् ओ इ विषयमे अपने छलफल, अध्ययनमे रहल बटैलै । भलमन्साहे व्यवस्थित, मर्यादित तथा समुदायप्रति जिम्मेवार बनैना मेरके पालिकासे कानुनी मान्यता डेना उहाँ बटैलै । अइना नगर सभासे भलमन्सा प्रथा संरक्षण तथा विकास ऐन लन्ना समेत मेउर रावत बटैलै ।

वादविवाद, झैँझडा न्याय निसाफ किल नैहोके, गाउँमे विकास निर्माणमे स्थानीयके सहभागिता जुटैना, गाउँके साझा समस्या, मुद्दाके बारेम छलफल कैना काम फेन इ भलमन्साहुक्रे महत्वपूर्ण भूमिका खेलल् उहाँ बटैलै ।