थारु साहित्यमे आख्यान लेखन गोष्ठी
पहुरा समाचारदाता
बर्दिया, ०१ कुँवार । युनिक नेपालके आयोजनामे जंग्रार साहित्यिक बखेरी, नेपाल ओ अमर शहिद बहुमुखी क्याम्पस, राजापुरके सहकार्यमे अमर शहिद बहुमुखी क्याम्पसमे थारु साहित्यमे आख्यान लेखन गोष्ठीके आयोजना हुइल बा । उ गोष्ठीमे अवसर कैसिक खोज्नाबारेमे फेन अभिमुखीकरण कार्यक्रम हुइल रहे ।
आख्यान लेखन गोष्ठीके सहजीकरण कथाकार शेखर दहित करले रहैं । उ अवसरमे कथाकार शेखर दहित अपन लिखित पुस्तक गयर्वा बुडु, ठाँह्रा ओ थारु जोधामे समोटल कथावस्तु, कथाके महत्व, कथा लेखनके तरिकाके बारेमे जानकारी करैले रहैं । हरेकसँग कथा रहठ मने, हम्रे उ कथाहे लेखन ओ दस्तावेज करे सेक्ले नैहुइटि । दस्तावेज करे सेकल खण्डमे यी अध्ययनके लाग महत्वपूर्ण सामग्री रहल उहाँ बटैलैं ।
कार्यक्रममे अमर शहिद बहुमुखी क्याम्पसके प्रमुख अनिल चौधरी हमार थारु भाषा पह्रना बानीके विकास नैहुइल बटैलैं । उहाँ कलैं, “सक्कु पाठ्यपुस्तक कि नेपाली कि अंग्रेजी भाषामे रहठ । टबेमारे थारु पुस्तक ओ यकर अध्ययनओर पाठकहुकनके ध्यान जाइ नैसेकल ।” यद्यपि, अब्बे थारु साहित्यके अत्यन्त गहकिल पुस्तक प्रकाशन हुइल ओ पाठक संख्या बह्रल उहाँ उल्लेख करलैं ।
कार्यक्रमके मोडरेशन युनिक नेपालके कार्यक्रम अधिकृत सोम डेमनडौरा करले रहैं । उहाँ युनिक नेपाल पठन सीप विकासके लाग ओ अध्ययन सामग्रीके सहज उपलब्धताके लाग युनिक पुस्तकालय सञ्चालनमे नानल जानकारी करैलैं ।
