अध्यादेश नान्के फेन ऐन नन्ना
पहुरा समाचारदाता
धनगढी, ०१ कुँवार । सुदूरपश्चिम प्रदेशके मुख्यमन्त्री त्रिलोचन भट्ट मुक्त कमैया, मुक्त कम्लहरी, मुक्त हलियालगायतके सीमान्तकृत वर्गके समस्याहे समाधानके लाग प्रदेश सरकार अध्यादेश नान्के फेन ऐन नन्ना बटैले बटैं ।
शनिच्चरके रोज धनगढीमे मुक्त कमैया महिला विकास मञ्च कैलालीके १५ औं साधारण सभा तथा पाँचौं अधिवेशन समारोहके उद्घाटन करटि मुक्त कमैया, कम्लहरी, मुक्त हलियालगायतके सीमान्तकृत वर्गहे पुनस्र्थापनाके लाग प्रदेश सरकार अभिन कानून बनाइ नैसेकल ओरसे अध्यादेश नान्के फेन समस्या समाधान करना आश्वासन डेलैं ।
उहाँ कलैं, “मुक्त कमैयाके पुनस्र्थापना, छुट कमैयाके तथ्यांक संकलन, लालपूर्जाके व्यवस्था, जग्गा व्यवस्था करेक लागल प्रदेश सरकार पहल करटि बा ।” “भूमिसम्बन्धी अधिकार संघीय सरकारसँग रहल ओरसे मुक्त कमैया, कम्लहरी, मुक्त हलिया ओ भूमिहीनके पक्षमे ढेर काम करे नैसेकाल हो,” उहाँ कलैं, “अब्बे प्रदेश सरकारके ठान कानून नान्के समस्याके सम्बोधन करना समय फेन नैहो । टबेमारे अध्यादेशके आवश्यकता डेखाइल बा । प्रदेश सरकार अध्यादेश नान्के मुक्त कमैयाहुकनके समस्याके सम्बोधन करि ।” उहाँ एकफाले सक्कु समस्याके समाधान करे नैसेक्ना हुइल ओरसे फेन काम नैहुइल जस्टे डेखाइल जिकिर कैलैं ।
मुख्यमन्त्री भट्ट जनता लग्गे रहल प्रदेश सरकार ओ स्थानीय सरकार आम जनमुदायसे चाहल अनुसार काम करे नैसेकल ओरसे अपेक्षित उपलब्धि हासिल करे नैसेकल बटैलैं । ओस्टेके उहाँ अइसिन सीमान्तकृत समुदाय लक्षित आयआर्जनके लाग सीपमूलक कार्यक्रम प्रदेश सरकारसे बनाइल बटैलैं । उहाँ मुक्त कमैयाहुकनहे कौन मेरिक सीपके आवश्यकता बा । उ प्रदेश सरकारहे सत्यतथ्यसहित लिखित जानकारी करैलेसे प्रदेश सरकार ओस्टेहे कार्यक्रम नन्ना योजना बनाइ सेक्ना बटैलैं ।
कार्यक्रममे संविधान सभा सदस्य हरि श्रीपाइली मुक्त कमैया, मुक्त कम्लहरीलगायतके समस्या सम्बोधनके लाग निरन्तर प्रयास करटिरहे परना बटैलैं । उहाँ प्रदेश सरकारसे नीति तथा कार्यक्रम बनाके मुक्त कमैयाहुकनके समस्याके सम्बोधन करे परना बटैलैं । उहाँ मुक्त कमैयाके बालबालिक, मुक्त कम्लहरीहुकनके शिक्षा, स्वास्थ्य, रोजगारके व्यवस्था सरकारसे करेपरना बटैलैं । उहाँ कलैं, “अइसिन सीमान्तकृत वर्गके समस्या समाधानके लाग सक्कु सरोकारवाला निकाय समन्वय कैके आघे बह्रना आवश्यक बा ।”
ओस्टेके, कार्यक्रममे सुदूरपश्चिम प्रदेश सरकारके मुख्य न्यायाधिवक्ता कुलानन्द उपाध्याय मुक्त कमैया समुदाय कृषिमे आत्मनिर्भर रहल ओरसे सरकार कृषिमे अनुदानलगायतके कार्यक्रम नाने परना बटैलैं ।
कार्यक्रममे प्रमुख जिल्ला अधिकारी किरण थापा मुक्त कमैया, हलियालगायत भूमिहीनहुकनके समस्या समाधानके लाग संघ, प्रदेश, स्थानीय तह समन्वय कैके आघे बह्रेपरना बटैलै रहैं ।
कार्यक्रममे नेपाल बार एशोशिएसनके केन्द्रीय उपाध्यक्ष तुलाराम गिरी, नेपाल राष्ट्रिय दलित समाज कल्याण संघ कैलालीके अध्यक्ष चक्र विकलगायत मन्तव्य व्यक्त करले रहैं ।
कार्यक्रम मुक्त कमैया महिला विकास मञ्च कैलालीके अध्यक्ष कौशिला चौधरीके अध्यक्षतामे हुइल रहे । मुक्त कमैया महिला विकास मञ्च मुक्त कम्लहरी, कमैया तथा सीमान्तकृत सामुदायिक अधिकारके लाग पैरवी, शिक्षा तथा आयआर्जन प्रवद्र्धनके लाग काम करटि आइल बा ।
