सांसद बन्ना डौरमे २९ वर्षिया गीता
पहुरा समाचारदाता
कञ्चनपुर, २ कात्तिक । कञ्चनपुरके २९ बर्षिया गीता चौधरी सुदूरपश्चिम प्रदेश सभा सदस्य बन्ना डौरमे बाटी ।
कञ्चपुर निर्वाचन क्षेत्र नं. २ क से उहाँ नागरिक उन्मुक्ति पार्टीसे प्रदेश सभा सदस्यके डौरमे उत्रल बाटी । नेपाल ल क्याम्पससे २५ बरसके उमेरमे नै एलएलएम (स्नातकोत्तर) प्रथम श्रेणी पास करल चौधरी अब्बे दैनिक मतदातासँग भोट मँग्नामे व्यस्त रहल बाटी ।
अनेरास्ववियुसे राजनीति सुरु करल उहाँ अनेरास्ववियुके इकाइसे केन्द्रसम, मानवअधिकार एलाइन्सके केन्द्रिय सदस्य हुइटी काठमाण्डौ–कञ्चनपुर सम्पर्क मञ्चके उपाध्यक्ष फेन हुइल रही ।
ओस्टके उहाँके अनुभव थारु विद्यार्थी समाजके केन्द्रिय उपाध्यक्ष, युथ एडभोकेसी नेपालके महासचिव, राष्ट्रिय युवा परिषदके निवर्तमान सदस्यसमके रहल बा ।
उहाँ महिला तथा बालबालिका, युवा विद्यार्थी, आदिवासी जनजाति, मुक्तकमैया, दलित विपन्न समुदायके हकहितके लाग आवाजके लाग राजनीति ओर लागल बटैली ।
उहाँ कहली, ‘बिगतसे महिला, युवा, कमैया, आदिवासी जनजाती ओ व्यवसायके मुद्दा उठैटी आइल रहुँ, मने उ सक्कु राजनीतिसे किल सम्भव हुइना हुइल ओरसे राजनीति ओर लागके प्रदेश सभाके उम्मेदवार बनल बाटुँ ।’
उहाँ जातीय, भाषिक, धार्मिक एवं सांस्कृतिक पहिचान सहितके मुद्दा सम्बोधन कैना आपन प्रमुख रहल बटैली । ओस्टके क्लाइमेट चेन्ज, दिगो विकास, महिला ओ युवाके नेतृत्व स्थापित कैना फेन आपन उम्मेदवारी रहल बटैली ।
साथे अपने भष्ट्राचार नैकैना ओ औरे जनहनहे फेन नैकरे डेना नीतिप्रति प्रतिवद्ध रहल बटैटी उहाँ सदाचारीहे पुरष्कृत ओ भष्ट्राचारीहे दण्डित कैना आपन पतिवद्धता रहल बटैली । कलेसे विकास निर्माण ओर उहाँ प्रदेश भित्रे उद्योगधन्दा, कलकारखाना खोलके श्रमशक्तिहे रोजगार बनैना ओर फेन आपन मुख्य एजेण्डा रहल सुनैली ।
साथे समाजमे रहल कुरीति, कुसंस्कार, अन्धविश्वास तथा सामाजिक असमानताहे वैज्ञानिक शिक्षा मार्फत निर्मूलीकरण कैना ओर आपन विशेष जोड रना बटैली ।
