कैलालीमे डेङ्गु रोगके जोखिम कायमे

४२६ जनहनमे डेङ्गु सक्रमण

पहुरा समाचारदाता
धनगढी, ४ कात्तिक । कैलालीमे मच्छरीनके कटाइसे सर्ना डेंङ्गु रोगके जोखिम कायमे रहल बा । स्वास्थ्य कार्यालय कैलालीके अनुसार कात्तिक ४ गतेसम जिल्लाके १३ स्थानीय पालिकामे अब्बेसम चार सय २६ डेंङ्गुके बिरामी रहल बाटै ।

जौनमध्ये धनगढी उपमहानगरपालिकामे एक सय ४४ डेंङ्गुुके बिरामी रहल बाटै । सबसे कम मोहन्याल गाउँपालिकामे तीन जाने रहल बाटै । घोडाघोडी नगरपालिका ओ जानकी गाउँपालिकामे चार–चार जाने कैके जम्मा चार सय २६ जाने रहल बाटै । लम्किचुहा नगरपालिकामे एक सय १३, बर्दगोरिया गाउँपालिकामे ७२, टीकापुर नगरपालिकामे ४० ओ गोदावरी नगरपालिकामे २८ जाने रहल स्वास्थ्य कार्यालयके फोकल पर्सन मीनबहादुर धामी जानकारी डेलै ।

गौरीगङ्गा नगरपालिकामे सात, भजनी नगरपालिकामे पाँच, जोशीपुर गाउँपालिकामे छ डेंङ्गुुके बिरामी रहल बाटै । कैलारी गाउँपालिका ओ चुरे गाउँपालिकामे अब्बेसम डेंङ्गुके बिरामी शून्य रहल जनाइल बा ।

जिल्लामे डेंङ्गुसे उपचारके क्रममे तीन जनहनके मुत्यु हुइल बा । धनगढी उपमहानगरपालिका–१२ के ३५ वर्षीया महिला गत भदौ १४ गते ओ बेलौरी १० कंचनपुर के १६ बर्षिया महिलाके निसर्ग अस्पतालमे उपचारके क्रममे मृत्यु हुइल बा । टीकापुर नगरपालिका–६ के १२ वर्षीया बालिकाके नेपालगञ्जमे मृत्यु हुइल स्वास्थ्य कार्यालय कैलालीके तथ्याङ्मे उल्लेखित रहल बा ।

कुँवार महिनाके मसान्तमे अविरल पानी परलपाछे पानी जमे सेक्ना भाँडाकुँडा, प्लास्टिकके बोतल, गमला, गाडीके टायरलगायत अन्य पानी जम्मा हुइना स्थानमे पानी जम्ना रहल ओरसे यकर जोखिम कायमे रहल जनाइल बा ।

कैलालीमे डेंङ्गुके प्रकोप कायमे रहल ओरसे यकर जोखिम नियन्त्रण कैना सबके साझा दायित्व रहल स्वास्थ्य कार्यालयके सूचना अधिकारी तेजविक्रम शाही बटैलै । सक्कु जाने आ–आपन घर, टोल, समाज, कार्यालय लगायतके स्थानमे वहाँ आँजरपाँजरके सरसफाइ कैना तथा पानी जमे नैडेना नै डेंङ्गु नियन्त्रणके उपाय रहल उहाँ बटैलै । डेंङ्गु रोगके बिरामीमे उच्च जुरी अइना, कपार पिरैना, पेट बठैना, वाकवाकी लग्ना, आँखीक गेडी पिरैना, जीउ तथा जोर्नी डुख्ना लगायतके लक्षण डेखजैना करल बा ।

अइसीन लक्षण डेखलमे तुरुन्त स्वास्थ्य संस्थामे उपचार करैना चिकित्सकके सुझाव रहल बा । डेंङ्गु मच्छरीनके कटाइसे सर्ना एक मेरके कीटजन्य सरुवा रोग हो । इ एडिस एजप्टाई–एलबोपिक्टस जातके सङ्क्रमित मच्छरीनके कटाइसे किल इ रोग सरठ् । इ मच्छरीनहे टाइगर मसकुइटो फेन कहिजाइठ् ।