थारु जातिहे मधेसी कलस्टरमे राखलपाछे थारु संगठनसे घोर भत्सर्ना
पहुरा समाचारदाता
धनगढी, ४ कात्तिक । थारु जातिहे मधेसी आयोगसे मधेसी कलस्टरमे समावेश करल कार्यप्रति थारु सम्वद्ध संघ संगठनसे घोर भत्सर्ना जनैले बाटै ।
थारु कल्याणकारिणी सभा कैलाली, थरुहट थारुवान राष्ट्रिय मुक्ति मोर्चा कैलाली, थारु नागरिक समाज कैलाली ओ थारु विद्यार्थी समाज कैलालीसे शुकके संयुक्त विज्ञप्ती जारी कैटी उ कार्यके घोर भत्सर्ना करल हुइट ।
मधेसी आयोगसे २०७९ कुँवार ३१ गते राष्ट्रपति समक्ष बुझाइल आपन चौथो वार्षिक प्रतिवेदनमे मधेसी समुदायके थर सूचीकरण अध्ययनमे थारु जातिहे फेन मधेसीमे समावेश करले बा ।
विज्ञप्तीमे कहल बा–‘२०७९ कुँवार ३१ गते राष्ट्रपति कार्यालयमे मधेसी आयोगसे आपन चौथो बार्षिक प्रतिवेदनमे मधेसी समुदायके थर सुचिकरणमे थारु जातिहे फेन मधेसीमे समावेश करल गैर जिम्मेवारीपूर्ण कार्यप्रति हम्रे घोर आपत्ति प्रकट करटी ।
राज्य सरकार शासश प्रशासक ओ गैर राज्य तथा प्रतिक्रियावादी पक्षसे नियोजित ढंगसे थारु जातिके पहिचान, अस्तित्व उपर धावा बोल्टी मधेसी सुचिकृतमे विगत से घरी घरी गलत क्रियाकलाप हुइटी आइल सर्वविदित बा । इ हर्कतके विरुद्धमे थरुहट थारुवान आन्दोलन मार्फत सम्बन्धित पक्षहे सचेत करैलेसे फेन संवैधानिक मधेसी आयोगसे थारु सुचिकरण अध्ययनके नाउँ तथ्य आधार प्रमाण विना राजनीतिक आडमे आदिवासी मुलबासी भुमिपुत्र थारु जातिके अस्तित्व पहिचान ओ इतिहासहे कुल्चना, समाप्त पर्र्ना षडयन्त्रके साथ सुनियोजित ढंगसे बुझाइल सिफारिस प्रतिवेदन प्रति हमार पूर्णरुपमे असहमति ओ आपत्ति रहल व्यहोरा जानकारी कराइटी । राष्ट्र, राष्ट्रियता, राष्ट्रिय स्वाधिनताके लाग तराईके धर्ती पुत्र थारुहुक्रे पुगैटी आइल योगदानहे नामेट पर्र्ना मधेसी आयोगके सिफारिससे समग्र थारु समुदाय दुःखी हुइल महसुस हुइल बा ।
यसर्थ मधेसी आयोगसे थारु समुदायहे मधेसीमे सुचिकरण करल दुस्प्रयास तथा सिफारिस प्रतिवेदन तत्काल सच्याइना सम्बन्धित मधेसी आयोगहे इहे प्रेस विज्ञप्ती मार्फत अनुरोध करटी । यदि मधेसी आयोगसे आपन प्रतिवेदन सिफारिसमे मधेसीमे थारु जाति सुचिकरण नैसच्याइलेसे उहीसे हुइना आशातित क्षतिके जिम्मेजारी मधेसी आयोगके हुइना व्यहोरा विज्ञप्ती मार्फत सम्बन्धित सक्कु जनहनहे जानकारी कराइटी ।’
