किसानके पायक पर्ना ठाउँमे धान विक्री डिपो ढारी

किसानहुक्रनसे लौवा फसलके धान भित्रैना काम कुवाँर महिनासे सुरु करसेकल रहिट । हाईबे्रट धान कुवाँरे महिनामे पाकके तयार हुइल रहे । टमान जैसिन किसान डसियासे आघे धान काटसेकल रहिट । डसियाके टीका लग्गटे लगटार करिब एक अठुवारसम पानी बरसल, उहीसे ढेर धानवाली क्षति हुइल । पानी बरसना रुकटीकी किसान धान काटके बेच्ना सुरु करल रहिट । किसान महंगा तेल, खाद पानी लगाके रोपाई करठैं । उत्पादन हुइल धान गल्ला व्यापारीके काटामे पुगलपाछे सस्तामे धान विक्री कैना अवस्था आइठ । सरकार प्रत्येक बरस धानवालीके समर्थन मोल तोकठ । मने सरकारसे संचालन करल विक्री केन्द्रमे बहुट कम किसान धान विक्री करठै । एक ओर सरकार बहुट ढिला धानवालीके समर्थन मोल तोकठ । दुसर ओर सर्वसाधारणके पायक पर्ना ठाउँमे विक्री डिपो केन्द्र नइधारठ ।

समर्थन मोल तोक्ना ढिलाई हुइलपाछे उहीसे आघे किसान गल्ला व्यापारीसे धान विक्री कैना बाध्य हुइठै । सरकारके धारल विक्री केन्द्रसम पुगाके बेचे चाहल किसान भाडाके टेक्टरमे पुगाईबेरफे कुन्टलमे सय/डेढ सय अलगसे डेहे पर्नाफे अवस्था बा । सरकार भर्खर आर्थिक वर्ष २०७९/८० के लाग मोटा धानप्रति क्विन्टल २ हजार ९६७ ओ मध्यम धानके प्रतिक्विन्टल मूल्य ३ हजार १२८ रुप्या तोकले बा । सरकार गैल बर्षसे मोटा धानमे प्रतिक्विन्टल २१५ रुप्या ओ मध्यम धानमे २२६ रुप्या ढेर बढाके तोकले बा, यी बहुत मजा बाट हो । आर्थिक वर्ष २०७८/७९ मे मोटा धानके सर्मथन प्रति क्विन्टल २ हजार ७५२ ओ मध्यम धानके मूल्य प्रति क्विन्टल २ हजार ९०२ रुप्या तोकल रहे । मने किसान उ मोलमे धान बेचे पैठै की नइपैना सरकारसे ध्यान डेना जरुरी बा ।

न्यूनतम समर्थन मूल्यमे कृषि सहकारीमार्फत धान खरिद कैना ३३ करोड बजेटसे यी आर्थिक वर्षमे ३ लाख मेट्रिकटन धान खरिद कैना सरकारी योजना बा । सरकार धानके मोल तोकल मने किसान अब्बेफे ओटरा मोलमे बेचे नइपाइट हुइट । किसानहुक्रे गल्ला बेपारीसे धान बेचसेकल अवस्था बा । बचलखुचल धान २३ सयसे २४ सयमे किसानसे बेच्ना बाध्य बटै ।

धान विक्री करुइया कुछ किसान बँचल हुइही मने पायक पर्ना ठाउँमे सरकारके विक्री डिपो केन्द्र संचालन हुईल नइहो । किसानहुकनके धानवाली गल्ला वेपारीके गोदममे पुगसेकलपाछे सरकारसे धानवालीके समर्थन मोल तोक्ले बा । उ धान आब व्यापारी सरकारहे बेचके मजा फाइदा लिही । किसान जबफे मारमे परटी रहल ओरसे सरकारके ध्यान यहोर कब जाई । टबमारे धानके समर्थन मोल तोक्के केल नइहुई, समयमे समर्थन मोल तोक्के किसानहुकनसे पायक पर्ना सक्कु स्थानीय तहमे विक्री केन्द्र हलहाली संचालन कैना जरुरी बा ।